Termiz davlat universitetida talabalar mushtlashdi (video)

Ijtimoiy tarmoqlarda Termiz davlat universiteti fizika-matematika fakulteti hovlisida talabalar ommaviy mushtlashgani aks etgan videolavha tarqaldi. Holat yuzasidan viloyat Ichki ishlar boshqarmasi Matbuot xizmati rasmiy munosabat bildirdi.

Aniqlanishicha, joriy yilning 9 dekabr kuni soat 12:49 da Termiz shahar "O‘zbekiston" MFYda joylashgan Termiz davlat universiteti fizika va matematika fakulteti binosining kirish qismida shu fakultetning  3-kurs va 1-kurs talabalari o‘rtasida o‘zaro janjal kelib chiqqan. 

Keyin ushbu talabalarni ajratish uchun ikkala tarafdan ham boshqa talabalar kelib, qo‘shilgan va janjallashayotgan talabalar ajratilgan.

Qayd etilishicha, mazkur holat yuzasidan, Termiz davlat universiteti ma’muriyati tomonidan ushbu talabalarga nisbatan qonuniy chora ko‘rish uchun Termiz shahar IIBga xabar berilgan.

“Hozirda, Termiz shahar IIB Huquqbuzarliklar profilaktikasi bo‘limi mas’ul xodimlari tomonidan tergovga qadar tekshiruv olib borilayotganligi ma’lum qilinadi va kelgusida qonuniy qaror qabul qilinishi ta’minlanadi”, deyiladi viloyat IIB munosabatida.