Tashlandiq samolyot hashamatli villaga aylandi (fotoreportaj)

2014 yilgacha Indoneziyaning Mandala Airlines aviakompaniyasiga tegishli bo‘lgan tashlandiq Boeing 737 samolyoti Balida hashamatli villaga aylantirilmoqda. Bu haqda “Homecrux” nashri xabar berdi. 

Qayd etilishicha, tadbirkor Feliks Demin boshchiligidagi ushbu loyiha 2023 yil mart oyida poyoniga yetib, mehmonxona sifatida tashrif buyuruvchilarni qabul qilishni boshlaydi. Agar o‘z vaqtida qurib bitkazilsa, “Private Jet Villa” (“hususiy samolyot villasi”) deb nomlanayotgan ushbu zamonaviy villani bir kecha-kunduzga 7300 AQSH dollariga ijaraga olish mumkin bo‘ladi. 

Tadbirkorning aytishicha, samolyotni asl joyidan hozirgi joyga ko‘chirish uchun bir hafta vaqt ketgan. U demontaj qilingan va joyida qayta qurilgan. Samolyot o‘rnatilgan tepalikka endilikda yog‘och yo‘lakcha orqali ko‘tarilish mumkin va uning yonida katta hovuz ham bor. Villaga aylantirilgan samolyotning qanotlarida esa shishali terassa barpo etilgan. Terassa yuqori sifatli mebellar bilan jihozlangan.

Shuningdek, loyiha mualliflari intererga minimalistik ruhda yondashgan va samolyot ichkarisida jami ikkita yotoqxona va ikkita hammom, shuningdek, oshxona, bar va ovqatlanish burchagi qurgan. Villa tashqarisida esa ko‘rkam bog‘ barpo etilgan. Samolyotni qulay yashash joyiga aylantirish uchun barcha boshqaruv panellari va o‘rindiqlar tashqariga, ochiq osmon ostiga joylashtirilgan.

Alibek Beyjanov