Tanasiga 52 ta chip o‘rnatilgan “kiborg” ayol Ginnesga kirdi

48 yoshli ayol tanasiga 52 ta texnologik implant o‘rnatib, rekordlar kitobiga kirdi. U chiplar yordamida hech qanday harakatsiz kompyuterni ishga tushirishi, telefon qo‘ng‘iroqlarini amalga oshirishi mumkin. Bu haqda "New York Post" xabar berdi.

AQSHda yashovchi Anastasiya Sin tanasiga dunyoning eng ko‘p texnologik implantlari o‘rnatilgan ayol sifatida Ginnesning rekordlar kitobiga kiritildi. Uning tanasida 52 ta implant bor. Shuningdek, ular orasida inson tanasiga o‘rnatish mumkin bo‘lgan eng katta magnit ham mavjud. Rekordchi ayol o‘zini "kiborg" deb hisoblaydi. Kiborg – tananing ma’lum qismi elektromexanikadan iborat degan ma’noni anglatadi.

Ayol tanasiga o‘rnatilgan chiplar yordamida kompyuterni yoqishi, uning kodini ochishi mumkin. Anastasiyaning bu g‘oyaga qiziqib qolishiga qizi sabab bo‘lgan.

"Qizim mendan agar tanasiga mikrochip implant o‘rnatsa, xuddi o‘yindagi qizlar kabi kompyuterning kodini ocha olishini aytib, ruxsat so‘radi. Men esa buni avval o‘zimda sinab ko‘rib xavfsizligini aniqlashim kerakligini aytdim", deydi u.

Ayolning aytishicha, implantlar unga oltinchi tuyg‘uni bergan.

"Men hozir sizga mikroto‘lqinli pechingiz juda ko‘p radiatsiya chiqarayotganini aytib berishim mumkin. Bunda mening qo‘lim titraydi", deydi u. Shuningdek, Anastasiya devor ortidagi elektr simlarini ham his qila oladi.

U implantlari yordamida hatto telefon qo‘ng‘iroqlarini ham amalga oshirishi mumkin.

"Chap bilagimdagi qizimga, o‘ng bilagimdagisi esa turmush o‘rtog‘imga qo‘ng‘iroq qila oladi", deydi "kiborg" ayol.

Anastasiyaning aytishicha, u tanasiga ba’zi implantlarni o‘zi joylashtirgan, ba’zilari uchun tibbiy yordam olgan.

Lekin rekordchi ayol tanaga implant o‘rnatishning xavflari borligi haqida ham ogohlantirdi.