Tailandda og‘ir ahvolda qolgan fuqaro O‘zbekistonga qaytarildi

Tailandning Pattaya shahrida salomatligi yomonlashgan o‘zbekistonlik ortga qaytarildi. Bu haqda “Dunyo” axborot agentligi xabar berdi.

Ma’lum qilinishicha, joriy yil 3 mart kuni O‘zbekiston fuqarosi I.S. Tailandning Pattaya shahrida insultga chalinishi oqibatida shoshilinch tarzda shifoxonaga yotqizilgan.

I.S. og‘ir jarrohlik operatsiyasini boshdan kechirgan. Biroq amalga oshirilgan muolajalarga qaramay, bemor tanasining chap tomoni ishlamay qolgan. 

Bildirilishicha, I.S. Tailandga ishlash maqsadida borgan, ammo tibbiy sug‘urta olmagan, shuningdek, ish beruvchi bilan mehnat shartnomasini ham tuzmagan. Ushbu holatlar tibbiy xarajatlarni to‘lashda qiyinchiliklar sabab bo‘ldi.

Shunga qaramay, joriy yilning 28 mart kuni bemorning yaqinlari, do‘stlari va faol vatandoshlar sa’y-harakatlari bilan tibbiy xarajatlarni qoplash va bemorni oilasi bag‘riga qaytarish uchun zarur mablag‘ yig‘ilgan.

Qayd etilishicha, bunday holatlar ko‘payib borayotgani munosabati bilan O‘zbekistonning Bangkokdagi Bosh konsulxonasi fuqarolarga chet elga sayohat qilish yoki ishlash uchun ketayotganda tibbiy sug‘urta olish, shuningdek, ish beruvchi bilan mehnat shartnomasini tuzish zarurligini eslatib o‘tdi. Ushbu chora-tadbirlar favqulodda vaziyatlarda himoya va zarur yordam olishda asqatadi.

“Biz barcha fuqarolarni chet elda bo‘lish vaqtida o‘z salomatligiga e’tiborliroq bo‘lishga chaqiramiz”, deyiladi diplomatik vakolatxona manbasida.

Eslatib o‘tamiz, joriy yilning 12-14 mart kunlari 19 nafar O‘zbekiston fuqarolari, jumladan Saudiya Arabistoni huquq-tartibot idoralari tomonidan ilgari hibsga olingan ayollar O‘zbekistonga qaytarilgandi.