Surxondaryoda futbol hakamlari do‘pposlandi (video)

Ijtimoiy tarmoqlarda Surxondaryo viloyatida hakamlar do‘pposlangani aks etgan video tarqalib, ko‘plab muhokamalarga sabab bo‘ldi. Holat yuzasidan viloyat futbol assotsiatsiyasi munosabat bildirdi.

Ushbu holat Surxondaryo viloyat birinchiligi 2-ligasining 2-turidan o‘rin olgan "Surxon Farm" va “Jarqo‘rg‘on” futbol jamoalari o‘rtasidagi o‘yinda yuzaga kelgan. Aytilishicha, yuqoridagi jamoalar o‘rtasidagi uchrashuv so‘ngida hakam Anvar Tursunov hushtak chalib uchrashuvni yakunlagan. Jarqo‘rg‘onliklar hujum vaqtida uchrashuvni to‘xtatgani uchun hakamga e’tiroz bildirgan.

Ma’lum qilinishicha, hozirda viloyat futbol assotsiatsiyasi huzuridagi Sport texnik qo‘mitasi holatni o‘rganish ishlarini olib bormoqda. Shuningdek, futbol o‘yinida janjal chiqarganlar jazolanishi ta’minlanishi bildirilgan.

Bundan tashqari, viloyat Ichki ishlar boshqarmasi tomonidan ushbu holat bo‘yicha ishchi guruh tayinlanib, surishtiruv ishlari olib borilmoqda. Hodisani Surxondaryo viloyati yoshlar siyosati va sport bosh boshqarmasi boshlig‘i Begzod To‘raboyev hamda viloyat futbol assotsiatsiyasi birinchi vitse-prezidenti Sanjar Shomurodov o‘z nazorati ostiga olgan.