Suriyadagi jangovar tayyorgarlikdan o‘tib, qaytgan shaxs Surxondaryoda ushlandi

Suriya Arab Respublikasida faoliyat yurituvchi xalqaro terrorchilik guruhlari tarkibida jangovar tayyorgarlikdan o‘tib, O‘zbekistonga qaytgan shaxs Surxondaryoda qo‘lga olindi. Bu haqda Davlat xavfsizlik xizmati xabar berdi.

Ma’lum bo‘lishicha, 2001 yilda Muzrabot tumanida tug‘ilgan S.A. 2019 yilda diniy ta’lim olish maqsadida Misr Arab Respublikasiga chiqib ketgan. Biroq, u Misrdagi hujrada diniy ta’lim olayotgan vaqtlarida “Tavhid va jihod katibasi” terrorchilik guruhi a’zolarining g‘oyaviy ta’siriga tushib qolgan. 

Keyin Misrdan Turkiya orqali Suriyaning “o‘choqli hudud”lariga chiqib ketgan hamda jangovar tayyorgarlikdan o‘tib, joriy yilning fevral oyida O‘zbekistonga qaytib kelgan.

“Amalga oshirilgan faol tadbir natijasida qo‘lga olingan S.A.ga nisbatan O‘zbekiston Respublikasi Jinoyat Kodeksining tegishli moddalari bilan jinoyat ishi qo‘zg‘atilgan bo‘lib, tergov harakatlari olib borilmoqda”, deyiladi xabarda.