Suriya gerbini o‘zgartirdi

Suriyaning yangi hukumati mamlakat gerbini o‘zgartirishga qaror qildi. Bu haqda “Al-Ikhbaria” telekanali xabar berdi.

Qayd etilishicha, yangi davlat ramzi Damashqdagi “Al-Ikhbaria” telekanali tomonidan namoyish etilgan tantanali tadbirlarda taqdim etilgan. Endi gerbning suratida qanotlari cho‘zilgan qush va uning boshi ustida uchta yulduz tasvirlangan.

Marosimda so‘zga chiqqan Suriya muvaqqat prezidenti Ahmad al-Sharaning so‘zlariga ko‘ra, o‘zgartirilgan qirg‘iy Suriya xalqining o‘z tarixidagi yangi bosqichga o‘tishini aks ettiradi, shuningdek, suriyaliklarga xos kuch va qat’iyatni o‘zida namoyon qiladi. Damashqdagi yangi hokimiyat rahbarining ta’kidlashicha, yangi gerb avvalgi tuzum zulmidan yakuniy tanaffus ramzidir.

Hozirgacha mavjud bo‘lgan Suriya gerbida ko‘kragida qalqon bo‘lgan qirg‘iy, uning ustida uchta yulduz va yangi Suriya hukumati bayrog‘i tasvirlangan edi. Qush panjalarida “Suriya Arab Respublikasi” yozuvi bor lentani ushlab turardi. Shunday qilib, gerb 1980 yilda Suriyaning sobiq prezidenti Hofiz al-Asad davrida qabul qilingan avvalgi versiyasiga o‘xshardi – yagona farq qirg‘iy boshining burilishi va ko‘kragidagi bayroq ranglarida edi.

Yangi gerbning joriy etilishi mamlakat siyosiy hayotida muhim bosqich sifatida e’tirof etilmoqda.

Eslatib o‘tamiz, avvalroq AQSH va Yevropa Ittifoqi sanksiyalari yumshatilganidan so‘ng Suriya yangi banknotalarni Rossiyaning “Goznak” korxonasida bosishdan voz kechishi xabar qilingandi. Damashq yangilangan pullarni Birlashgan Arab Amirliklari (BAA) va Germaniyada bosmoqchi. Natijada 2024 yil dekabrida hokimiyatdan ag‘darilgan sobiq prezident Bashar Asad tasviri mashhur 2000 funtlik kupyuradan olib tashlanadi.