Sun’iy intellekt osmono‘par binolarni loyihalashni boshladi (foto)

Sun’iy intellekt baland binolar qurish uchun bir qancha chizma-loyihalarni taqdim etdi. Bu haqda mashhur arxitektor Patrik Shumaxer “Dezeen” saytiga bergan intervyusida ma’lum qildi.

Uning so‘zlariga ko‘ra, sun’iy intellekt tomonidan taqdim qilingan bir qator zamonaviy binolarning loyihalari bo‘yicha yaqin kelajakda qurilish ishlari boshlanadi. Sun’iy intellekt loyihlashtirgan binolarning aksariyati ko‘p qavatli bo‘lib, tashqi tomondan noma’lum shaklni ifoda etadi. Ammo binolarning kostruksiyasi an’anaviy to‘rtburchak shakldan andoza olingan. Hozirda loyihalar mukammallashtirilmoqda.

“Biz bu orqali katta ijodiy yutuqlarga erishishimiz mumkin. Ularda qiziqarli g‘oyalar, yangi turdagi shakl-harakatlar bor va biz ular tomondan ishlab chiqilgan chizmalarni hatto mijozlarga ham dastlabki eskizlar sifatida ko‘rsatishimiz mumkin. Shunchaki biz sun’iy intellektga xom-ashyolarni ko‘rsatamiz, u esa tayyor g‘oyalarni chiqarib beradi. Oxirgi natijalarga e’tibor beradigan bo‘lsak yorug‘lik, soya, geometriya kabi arxitektura uchun zarur bo‘lgan elementlarni kamchiliklarsiz ko‘rsatib bermoqda”, deydi me’mor Shumaxer.

Ta’kidlash kerakki, bugungi kunda dunyoning turli qismlarida katta shaharlarni qurish odatiy holga aylanib bormoqda. Saudiya Arabistonidagi “Neom” shahri ham hozirgi paytda eng katta qurilish loyihasi hisoblanadi. Ayni vaqtda mazkur mega shahar uchun ham bir qator yangi loyihalar sun’iy intellekt tomonidan yaratilmoqda.

Nurmuhammad Fayzullayev