Сунъий интеллект осмонўпар биноларни лойиҳалашни бошлади (фото)

Сунъий интеллект баланд бинолар қуриш учун бир қанча чизма-лойиҳаларни тақдим этди. Бу ҳақда машҳур архитектор Патрик Шумахер “Dezeen” сайтига берган интервьюсида маълум қилди.

Унинг сўзларига кўра, сунъий интеллект томонидан тақдим қилинган бир қатор замонавий биноларнинг лойиҳалари бўйича яқин келажакда қурилиш ишлари бошланади. Сунъий интеллект лойиҳлаштирган биноларнинг аксарияти кўп қаватли бўлиб, ташқи томондан номаълум шаклни ифода этади. Аммо биноларнинг кострукцияси анъанавий тўртбурчак шаклдан андоза олинган. Ҳозирда лойиҳалар мукаммаллаштирилмоқда.

“Биз бу орқали катта ижодий ютуқларга эришишимиз мумкин. Уларда қизиқарли ғоялар, янги турдаги шакл-ҳаракатлар бор ва биз улар томондан ишлаб чиқилган чизмаларни ҳатто мижозларга ҳам дастлабки эскизлар сифатида кўрсатишимиз мумкин. Шунчаки биз сунъий интеллектга хом-ашёларни кўрсатамиз, у эса тайёр ғояларни чиқариб беради. Охирги натижаларга эътибор берадиган бўлсак ёруғлик, соя, геометрия каби архитектура учун зарур бўлган элементларни камчиликларсиз кўрсатиб бермоқда”, дейди меъмор Шумахер.

Таъкидлаш керакки, бугунги кунда дунёнинг турли қисмларида катта шаҳарларни қуриш одатий ҳолга айланиб бормоқда. Саудия Арабистонидаги “Neom” шаҳри ҳам ҳозирги пайтда энг катта қурилиш лойиҳаси ҳисобланади. Айни вақтда мазкур мега шаҳар учун ҳам бир қатор янги лойиҳалар сунъий интеллект томонидан яратилмоқда.

Нурмуҳаммад Файзуллаев