MMA'ga atalgan hafta – Sport dayjesti

O‘zbekistonlik shaxmatchilar uchun Jahon kubogi erta yakunlandi, Gulruhbegim Tohirjonova Amerikaning eng yaxshi ayol shaxmatchisi bo‘ldi, dzyudochi Muzaffar To‘raboyev “Masters” turnirida g‘olib bo‘ldi, o‘zbekistonlik UFC jangchisi Bogdan Guskov tashkiotdagi dastlabki jangidayoq jiddiy raqibga duch keladi. Assalomu alaykum! QALAMPIR.UZ’da sport dayjesti.

O‘zbekistonlik shaxmatchilar Jahon kubogida muvaffaqiyatsiz ishtirok etdi

Ozarbayjon poytaxti Baku shahrida shaxmat bo‘yicha Jahon kubogi bahslari davom etmoqda. 10 avgust kuni  1/16 final uchrashuvlarining 2-partiyasi bo‘lib o‘tdi. 

Unda mazkur bosqichga qadar yetib kelgan yagona o‘zbekistonlik shaxmatchi Javohir Sindorov Hindiston vakili Arjun Erigaisiga qarshi ikkinchi o‘yinni o‘tkazdi.

Dastlabki partiyada durang bilan qanoatlangan Sindorov 2-bahsda raqibiga imkoniyatni boy berib qo‘ydi va musobaqadagi ishtirokini 4-bosqichda yakunlashga majbur bo‘ldi. 

Shu tariqa, O‘zbekiston shaxmatchilar uchun Bakudagi Jahon kubogi o‘z nihoyasiga yetdi.

Tohirjonova AQSHning eng yaxshi ayol shaxmatchisi bo‘ldi

Asli o‘zbekistonlik bo‘lgan, hozirda AQSH ayollar jamoasi sharafini himoya qilayotgan grossmeyster Gulruhbegim Tohirjonova AQSHning eng yaxshi ayol shaxmatchisi deb topildi. 

Kuni kecha sportchi Amerika shaxmat federatsiyasi tomonidan o‘z sovrinini qabul qilib oldi. 

Tohirjonova 2021 yildan buyon AQSH jamoasi tarkibida dona surib keladi. 24 yoshli shaxmatchi 2016 yilda grossmeyster unvonini qo‘lga kiritgan.

Tohirjonova o‘z vaqtida O‘zbekiston shaxmat federatsiyasi rahbariyati bilan nizolar sabab O‘zbekiston terma jamoasi a’zoligidan ketgan. O‘tgan yili dekabr oyida Qozog‘istonning Olmaota shahrida o‘tkazilgan shaxmatning rapid va blits yo‘nalishlaridagi Jahon chempionatida Gulruhbegim AQSH bayrog‘i ostida o‘z opasi Nafisa Mo‘minovaga qarshi dona surib, g‘alaba qozongandi.

12 yillik tanaffus yakunlandi. O‘zbekistonlik dzyudochi nufuzli musobaqada g‘olib bo‘ldi

Vengriyaning Budapesht shahri mezbonlik qilgan dzyudo bo‘yicha “Masters” turniri yakunlandi. -100 kg vaznda bahslarda ishtirok etgan O‘zbekiston vakili Muzaffarbek To‘raboyev oltin medalga ega chiqdi.

To‘raboyev turnirdagi dastlabki bahsida ikki karra Olimpiada va jahon chempioni Lukash Krpalek ustidan g‘alaba qozondi. Shuningdek, o‘zbekistonlik dzyudochi Sheydi Elnaxas (Kanada), Mixael Korrel (Niderlandiya) va Boyan Dosen (Serbiya) kabi sportchilardan ustun keldi. Finalda To‘raboyev isroillik Peter Paltchikni mag‘lub etdi.

“Masters” turniridagi g‘alaba orqali To‘raboyev 1800 reyting ochkosiga ham ega bo‘ldi. 

Musobaqa davomida o‘zbekistonlik sportchilardan -90 kg vazn toifasida Davlat Bobonov, ayollar o‘rtasida -52 kg da Diyora Keldiyorova shohsupaning 3-pog‘onasidan joy oldi. 

yilda bir bora o‘tkaziladigan “Masters” musobaqasida o‘zbekistonliklardan so‘nggi bor 2011 yilda Rishod Sobirov g‘alaba qozongan edi. Shu tariqa, O‘zbekiston terma jamoasi bu yilgi turnirni 1 ta oltin va 2 ta bronza medali bilan yakunladi.

UFC Guskovga jiddiy raqib berdi

2 sentyabr kuni Fransiyada navbatdagi UFC Fight Night musobaqasi bo‘lib o‘tadi. Mazkur musobaqa doirasida O‘zbekistonda tug‘ilgan va mamlakat bayrog‘i ostida janglarda ishtirok etuvchi yarim og‘ir vaznli UFC vakili Bogdan Guskov debyut jangini o‘tkazadi.  O‘sha kuni unga Shveysariya vakili Volkan Ozdemir raqiblik qiladi. 

Avvaliga Ozdemirning rossiyalik Azamat Murzakonovga qarshi jang qilishi belgilangan edi. Biroq Murzakonov bu jangda ishtirok eta olmasligi ma’lum bo‘ldi. Bu orqali UFC bilan yaqindagina shartnoma imzolagan o‘zbekistonlik sportchi Murzakonovning o‘rniga zaxira jangchisi sifatida Ozdemir bilan jang qiladigan bo‘ldi.

Bogdan Guskov professional faoliyati davomida 16 ta jang o‘tkazgan bo‘lib, ularning 14 tasida g‘alabaga erishgan va 2 ta bahsda raqiblariga imkoniyatni boy berib qo‘ygan. Uning shveysariyalik raqibi Volkan Ozdemir esa bunga qadar 25 ta jangda ishtirok etib, 18 tasida yutgan va 7 ta jangda mag‘lubiyatga uchragan. U Guskovga qaraganda ancha tajribali hisoblanadi. Ozdemir faoliyati davomida Daniyel Korme, Entoni Smit, Dominik Reyes, Irji Proxaska, Magomed Ankalayev kabi sportchilar bilan jang qilgan.

Murodovning keyingi rejalari ma’lum bo‘ldi

6 avgust kuni Toshkent shahrida o‘zbekistonlik UFC jangchisi Mahmud Murodov ishtirokida matbuot anjumani bo‘lib o‘tdi. Tadbirda Murodov jurnalist va muxlislarning bir qator savollariga javob berdi.

Ma’lumki, Murodov oxirgi jangida amerikalik tajribali Brayan Barberenani mag‘lub etdi. Barberenaga qarshi jangga tayyorgarlik ko‘rish maqsadida ancha muddat O‘zbekistonda bo‘lmagan sportchi endi e’tiborini Murodov professional ligasining (MPL) tashkiliy ishlariga qaratishini aytib o‘tdi.

Shuningdek, Murodovning murabbiyi Jasur Alijonov MPL'ning 8-turniri sentyabr oyida o‘tkazilishi reja qilinayotganini ta’kidladi.

“MPL 8 katta masshtabda o‘tkaziladi. MPL 10'ni esa “Humo arena”da o‘tkazishni rejalashtiryapmiz. MPL 10'ga Markaziy Osiyo va Yevropaning nomdor sportchilarini jalb qilishni o‘ylaganmiz. Hozircha boshqa ligalar bilan hamkorlikda turnir o‘tkazish niyatimiz yo‘q”,

Tadbirda o‘zbekistonlik sobiq UFC jangchisi Saidyoqub Qahramonov ham MPL bilan shartnoma imzolagani ma’lum bo‘ldi.

“Qahramonov bizning liga bilan shartnoma imzoladi. Hozir u bilan MPL'ning qaysi turnirida jang qilishi bo‘yicha muzokara ketmoqda”, 

Yig‘ilganlar Murodovning UFC'dagi keyingi jangi bo‘yicha rejalari bilan ham tanishdi.

“Raqibni menga UFC belgilab beradi. Keyingi jangimning qachon o‘tkazilishi mening jismoniy holatimga bog‘liq. Vaziyatga qaraymiz, balki noyabr yoki dekabr oyida jang qilarman”, 

Bir necha kun oldin QALAMPIR.UZ’ning YouTube sahifasiga nashrimizning Mahmud Murodov bilan qilgan intervyusi joylandi. Intervyuda sportchi UFCʼdagi keyingi jangi, marhum Murod Xonto‘rayev bilan munosabati, qo‘qonlik sportchi Humoyun To‘xtamurodovning MPLdan ketishi, bir vaqtlar ijtimoiy tarmoqlarda tarqalgan behayo videolar va boshqa bir qator shov-shuvli holatlarga izoh berdi.

Benzema Umra ziyoratini bajardi

6 avgust kuni Saudiya Arabistonining “Al-Ittihod” klubi hujumchisi Karim Benzema Umra ziyoratiga bordi. 

5 iyun kuni Ispaniyaning “Real Madrid” klubidan erkin agent sifatida Jiddaning “Al-Ittihod” klubiga ko‘chib o‘tgan futbolchi transferdan so‘ng, ilk marta Umra ziyoratini amalga oshirdi.

35 yoshli Fransiyalik futbolchi Jidda klubi bilan ikki yillik shartnoma imzolagan va u bu muddat ichida 200 million yevro ishlab oladi.

Benzema 2009 yildan buyon “Real Madrid” safida to‘p surib kelayotgandi. U 353 ta gol bilan klub tarixida Krishtianu Ronaldudan keyin ikkinchi eng yaxshi to‘purar maqomini qo‘lga kiritdi. 35 yoshli hujumchi ortda qolgan mavsumda “qaymoqranglilar” safida barcha turnirlarda 42 ta o‘yinda maydonga tushib, 30 ta gol urdi va 6 ta golli uzatmani amalga oshirdi.

Shomurodov yangi klubida qaysi raqam ostida to‘p tepadi?

O‘zbekiston milliy terma jamoasi sardori Eldor Shomurodov Italiyaning “Kalyari” klubi safida 61-raqam ostida to‘p tepadigan bo‘ldi. 

“Kalyari” Instagram'ida e’lon qilingan postdan italiyalik futbolchi Alessandro Deyola yangi mavsum jamoada 14-raqamda o‘ynashini bilib olish mumkin. Demak, Shomurodov yangi jamoasida o‘zining sevimli raqamida to‘p tepa olmaydi.

“Kalyari” 27 iyul kuni Shomurodov transferini e’lon qildi. “Kalyari” o‘zbekistonlik 29 yoshli hujumchini 9 million yevro evaziga, keyinchalik sotib olish huquqi bilan bir yilga ijaraga oldi. 

Avgust oyi boshida o‘zbekistonlik yana bir futbolchi Otabek Shukurov ham faoliyatini Italiyada davom ettirishi mumkinligi xabar qilingandi. Shukurovga Eldor Shomurodovning sobiq jamoasi “Jenoa” qiziqish bildirmoqda.

Xasbulla UFC’dan qancha daromad qildi?

Xasbik nomi bilan mashhur bo‘lgan rossiyalik bloger Xasbulla Muhammedov UFC'da so‘nggi bir yilda qancha pul ishlab olgani ma’lum bo‘ldi. 

Bloger 2022 yilning sentyabr oyidan bugunga qadar UFC homiyligida million dollardan ortiq daromad olgan.

“Xasbik - ajoyib yigit. U o‘tgan vaqt ichida aql bovar qilmaydigan ishlarni amalga oshira oldi. Biz u bilan kelishuvga erishdik. Hozir uning surati tushirilgan futbolkalarni sotyapmiz, bu esa unga juda ko‘p foyda keltirmoqda. Xasbikning hozirgacha ishlab topgan puli 1 million dollardan oshib ketdi. Bu faqat UFC'dan, Xasbikning boshqa bizneslari ham bor”, 

Muhammedov bir necha yillardan beri aralash yakkakurashlar (MMA) olamida ancha mashhur hisoblanadi. Uning bo‘yi 93 santimetr, og‘irligi esa taxminan 18 kilogrammni tashkil qiladi.