“Siti” Gvardiolaga tegishli buyumlarni kimoshdi savdosiga qo‘ydi

“Manchester Siti” klubi sobiq bosh murabbiy Pep Gvardiolaning “Etihad” stadionidagi ishxonasidan olingan shaxsiy buyumlarni onlayn kimoshdi savdosiga qo‘ydi. Bu haqda “Reuters” xabar berdi.

Klub muxlislari endi Gvardiolaga tegishli turli noyob buyumlar, jumladan, uning taktik hushtagi, mashg‘ulot liboslari va shaxsiy dekorativ ashyolarini sotib olish imkoniyatiga ega bo‘ladi.

Kimoshdi savdosiga qo‘yilgan kolleksiyadan murabbiyning kundalik foydalangan buyumlari, shaxsiy ashyolari hamda mashg‘ulotlar davomida ishlatilgan taktik vositalar o‘rin olgan. 

Eng qimmatli lotlardan biri Erling Holandning Premer-ligadagi golli yutuqlariga bag‘ishlab maxsus tayyorlangan futbol to‘pi hisoblanadi. Unda norvegiyalik hujumchining chempionatdagi 100 ta golgacha bo‘lgan yo‘li aks ettirilgan eksklyuziv grafika va uning shaxsiy imzosi joylashtirilgan.

Mazkur to‘p allaqachon kimoshdi savdosining eng mashhur lotiga aylangan bo‘lib, unga qariyb 3 ming yevro (taxminan 3400 AQSH dollari) miqdorida taklif bildirilgan. Auksion yakunlanguniga qadar bu summa yanada oshib ketishi kutilmoqda.

Bundan tashqari, muxlislar Gvardiolaning shaxsiy mashg‘ulot hushtagi, ishxona kreslosi, stol chirog‘i va qahva krujkalari to‘plami uchun ham taklif berishlari mumkin.

Shuningdek, murabbiy ishxonasida xotirjam muhit yaratish uchun foydalangan xushbo‘y tutatqilar, bo‘yalgan yulduz, ikkita keramik toshbaqa kabi dekorativ suvenirlar ham sotuvga chiqarilgan.

Kimoshdi savdosida Gvardiolaning klub bilan qo‘lga kiritgan sovrinlari fonida tushgan ramkaga solingan suratlari ham xaridorlarga taklif etilmoqda.

Ma’lumot uchun, Gvardiola o‘tgan mavsum yakunidan so‘ng “Manchester Siti”ni tark etdi. U o‘n yil davomida jamoani olti marta Angliya Premer-ligasi chempionligiga olib chiqdi. Shuningdek, uning rahbarligida klub Chempionlar ligasi va FIFA Klublar o‘rtasidagi jahon chempionatida ham bosh sovrinni qo‘lga kiritdi.