Sirdaryoda o‘qituvchilarni majburan ishlatgan maktab direktori jazolandi

Ijtimoiy tarmoqlarda Sirdaryo viloyati, Oqoltin tumanidagi 9-maktab o‘qituvchilari maktab direktori tomonidan majburiy mehnatga jalb qilinganligi haqida xabarlar tarqaldi. 

Ushbu holat Sirdaryo viloyati Bandlik bosh boshqarmasi Davlat mehnat inspeksiyasi tomonidan o‘rganib chiqildi. 

Aniqlanishicha, Sirdaryo viloyati, Oqoltin tumani 9-son maktab direktori o‘qituvchilarni maktab hovlisi va atrofini tozalash ishlariga majburiy tarzda jalb qilgan.

Mazkur holat bo‘yicha maktab direktoriga nisbatan O‘zbekiston Respublikasi Ma’muriy javobgarlik to‘g‘risidagi kodeksning 51-moddasi 1-qismiga asosan bazaviy hisoblash miqdorining 50 (12 mln 250 ming) barobari miqdorida ma’muriy jarima qo‘llanildi.

Eslatib o‘tamiz, avvalroq, Qashqadaryo viloyati, Qarshi shahridagi 31-maktab direktori chet tili o‘qituvchilarini hojatxonani tozalash va ta’mirlash ishlariga majburan jalb qilgani haqida xabar bergan edik.