Shveysariya Fransiya bilan harbiy mashg‘ulot o‘tkazadi

Neytral maqomga ega Shveysariya 3-4 sentyabr kunlari NATO a’zosi Fransiya bilan harbiy mashg‘ulotlarni o‘tkazadi. Bu haqda Shveysariya hukumati ma’lum qildi,

Gap Shveysariyaning to‘rtta F/A-18 qiruvchi samolyoti va Fransiya harbiy-dengiz kuchlarining bir xil miqdordagi Rafale qiruvchi samolyotlarining ikki mamlakat havo hududida qo‘shma parvozlari haqida ketyapti.

“Shveysariya harbiy-havo kuchlari va Fransiya harbiy-dengiz kuchlari 3 va 4 sentyabr kunlari qo‘shma mashg‘ulotlar o‘tkazadi”, deyiladi xabarda.

Ikki davlatning “havo hududida bir nechta o‘quv modullari” rejalashtirilgan. Odatda Fransiya shimoli-g‘arbidagi Landivizio harbiy-dengiz havo bazasida joylashgan fransuz qiruvchi samolyotlari bir kecha Shveysariyaning Payern aviabazasida bo‘lib, u yerda “qo‘shma mashg‘ulotlar”da qatnashadi. Gap, xususan, “havo hujumidan mudofaa mashqlarini rejalashtirish, amalga oshirish va tahlil qilishni sinovdan o‘tkazish” va “tajriba almashish” haqida bormoqda.

Shveysariya va Fransiya o‘rtasidagi qo‘shma harbiy mashg‘ulotlar 2018 yilda imzolangan ikki tomonlama kelishuv asosida o‘tkazilmoqda. 

“Bu ikki mamlakat harbiy-havo kuchlari o‘rtasida ta’lim va kadrlar tayyorlash sohasidagi uzoq muddatli hamkorlikning bir qismi bo‘lib, xalqaro hamkorlik orqali mudofaa qobiliyatini mustahkamlashga qaratilgan”, deyiladi rasmiy Bern bayonotida.

Shveysariya hukumati tomonidan 2024 yil 31 yanvarda qabul qilingan tashqi siyosat strategiyasida NATO bilan aloqalarni mustahkamlash, jumladan, harbiy mashg‘ulotlarda ishtirok etish va armiyaning o‘zaro hamkorligini yaxshilashga sodiqligini tasdiqladi. NATO va YeI a’zosi bo‘lmagan Shveysariya o‘zining neytral maqomiga ega bo‘lishiga qaramay, Ukrainadagi urush munosabati bilan Yevropa Ittifoqining Rossiyaga qarshi joriy qilgan sanksiyalarini qo‘llab-quvvatlaydi.

Eslatib o‘tamiz, oldinroq Shveysariya Xavfsizlik komissiyasi Rossiya tomonidan qilinayotgan tahdid tufayli mamlakatning 1515 yildan beri saqlab kelayotgan betaraflik siyosatini qayta ko‘rib chiqishga chaqirgandi.