Shomurodovning natijasi Italiya matbuotini “portlatdi”

Futbol bo‘yicha O‘zbekiston terma jamoasi sardori Eldor Shomurodovning mahalliy va Yevropa futbolidagi natijalari haqida Italiyaning “Calciospezia” nashrida katta maqola chop etildi.

Unda Shomurodov ijarada to‘p surgan “Spetsiya” jamoasi A seriyadan quyiga tushib ketgani va mavsum o‘zbek futbolchisi uchun omadsiz o‘tganiga alohida to‘xtalib o‘tilgan.

“Spetsiya” jamoasida iz qoldira olmagan Eldor Shomurodov O‘zbekiston milliy terma jamoasi safida yuqori darajada o‘yin ko‘rsatishda davom etmoqda”, deyiladi xabarda.

Shuningdek, Eldorning Toshkentda bo‘lib o‘tayotgan “CAFA Nations Cup 2023” turnirida qayd etayotgan natijalari haqida ham iliq fikrlar bildirilgan.

“Kuni kecha Turkmaniston futbolchilari bilan bo‘lgan bahsda “o‘zbek Messisi” raqib darvozasiga kiritilgan ikkita golga mualliflik qilib, o‘zi sardorlik qilayotgan O‘zbekiston milliy terma jamoasiga g‘alaba keltirdi”, deb yozadi “Calciospezia” nashri.

Ma’lumot uchun, Eldor Shomurodov joriy yilning 14 iyun kuni “CAFA Nations Cup 2023” turniri doirasida bo‘lib o‘tgan O‘zbekiston va Turkmaniston uchrashuvida terma jamoa safidagi 63-o‘yinini o‘tkazdi. Maydonda qayd etilgan har ikki golga mualliflik qilgan Eldor 36 ta gol bilan terma jamoaning yetakchi to‘purariga aylanib oldi.