Шомуродовнинг натижаси Италия матбуотини “портлатди”

Футбол бўйича Ўзбекистон терма жамоаси сардори Элдор Шомуродовнинг маҳаллий ва Европа футболидаги натижалари ҳақида Италиянинг “Calciospezia” нашрида катта мақола чоп этилди.

Унда Шомуродов ижарада тўп сурган “Специя” жамоаси А сериядан қуйига тушиб кетгани ва мавсум ўзбек футболчиси учун омадсиз ўтганига алоҳида тўхталиб ўтилган.

“Специя” жамоасида из қолдира олмаган Элдор Шомуродов Ўзбекистон миллий терма жамоаси сафида юқори даражада ўйин кўрсатишда давом этмоқда”, дейилади хабарда.

Шунингдек, Элдорнинг Тошкентда бўлиб ўтаётган “CAFA Nations Cup 2023” турнирида қайд этаётган натижалари ҳақида ҳам илиқ фикрлар билдирилган.

“Куни кеча Туркманистон футболчилари билан бўлган баҳсда “ўзбек Мессиси” рақиб дарвозасига киритилган иккита голга муаллифлик қилиб, ўзи сардорлик қилаётган Ўзбекистон миллий терма жамоасига ғалаба келтирди”, деб ёзади “Calciospezia” нашри.

Маълумот учун, Элдор Шомуродов жорий йилнинг 14 июнь куни “CAFA Nations Cup 2023” турнири доирасида бўлиб ўтган Ўзбекистон ва Туркманистон учрашувида терма жамоа сафидаги 63-ўйинини ўтказди. Майдонда қайд этилган ҳар икки голга муаллифлик қилган Элдор 36 та гол билан терма жамоанинг етакчи тўпурарига айланиб олди.