Shols Ukrainaga TAURUS raketalarini berishga qarshi chiqdi

Germaniya kansleri Olaf Shols mamlakatining urushga qo‘shilish xavfi sababli Ukrainaga uzoq masofaga uchuvchi TAURUS qanotli raketalarining yetkazib berilishini qat’iyan rad etdi. Bu haqda bugun, 26 fevral kuni Dpa xabar berdi.

"Biz hech qanday tarzda ushbu tizim erishadigan maqsadlar bilan bog‘lanmasligimiz kerak", degan Shols. 

Kanslerning fikricha, shuning uchun ham bunday qurollarni topshirish masalasi hali kun tartibida emas.

"Meni bu ba’zi odamlarga hatto ta’sir qilmayotgani, ular bizning qilayotgan ishimiz urushda ishtirok etishga olib kelishi mumkinligi haqida o‘ylamayotganidan hayratda qoldim", deydi kansler.

Shuningdek, Germaniya hukumati rahbari Ukrainaga hozir haqiqatan ham kerak bo‘lgan narsa va ushbu yagona tizim bo‘yicha bahslar o‘rtasida "muvozanat yo‘qligi"dan g‘azablangan.

"Ukrainaga barcha mumkin bo‘lgan masofalar uchun o‘q-dorilar etishmayapti, bu Germaniyadan bo‘lishi shart emas", deydi u.

Qayd etish joizki, Germaniya kansleri oldin ham Ukraina Qurolli kuchlari tomonidan Rossiyadagi nishonlarga zarba berish uchun ishlatilishi mumkinligidan qo‘rqib, Kiyevga TAURUS qanotli raketalari yetkazib berilishiga bir necha bor qarshi chiqqan.

Germaniya Bundestagida hukumatga qilingan bosimlarga qaramay, uning pozitsiyasi o‘zgarmadi. Bundan tashqari, CDU/CSU konservativ partiyalarining muxolifat bloki va mamlakatning sotsial-demokratlar, yashillar va liberallardan iborat hukmron koalitsiyasining ayrim siyosatchilari ham Kiyevga TAURUS raketalari berilishini ochiqdan ochiq talab qilmoqda.

Eslatib o‘tamiz, o‘tgan haftada Germaniya parlamenti Ukrainaga uzoq masofaga uchuvchi qurol tizimlarini yetkazib berishga chaqiruvchi rezolyutsiyani qabul qilgandi.