Shavkat Mirziyoyev Qamashidagi mahallaga borib, aholi bilan suhbatlashdi

Bugun, 21 oktyabr kuni Prezident Shavkat Mirziyoyev Qamashi tumanidagi Chim mahallasida amalga oshirilgan bunyodkorlik ishlari va aholi bandligini ta’minlash choralari bilan tanishdi. Bu haqda O‘zbekiston yetakchisining matbuot xizmati xabar berdi.

Qayd etilishicha, “Yangi O‘zbekiston qiyofasidagi mahalla” sifatida rivojlantirilayotgan Chimda 5,5 mingdan ortiq aholi istiqomat qiladi, ularning qariyb yarmini yoshlar tashkil etadi.

Infratuzilmani yangilashga 55 milliard so‘m yo‘naltirilib, 240 o‘rinli bolalar bog‘chasi, 640 o‘rinli maktab, mahalla va yoshlar markazlari, istirohat bog‘i barpo etilgan. Shuningdek, 4,5 kilometr yo‘l qurilib, elektr ta’minoti va sug‘orish tarmoqlari yangilangan.

Davlat rahbari mahalla markazidagi o‘yingohda bolalar va ularning onalari bilan suhbatlashgan. Yoshlar kutubxonasida esa kitobxon yigit-qizlarning maqsad va intilishlari bilan qiziqqan.

Muloqotda Prezident O‘zbek tili bayrami munosabati bilan Abdulla Oripov, Erkin Vohidov va Halima Xudoyberdiyeva ijodini eslagan. Tilga, milliy adabiyotga va ajdodlar merosiga e’tibor ortib borayotganini qayd etgan.

“Bugun tilimizga, millatimizga va o‘zligimizga bo‘lgan ehtirom tobora yuksalmoqda. Odamlar yana kitob o‘qishga intilyapti. Ota-bobolarimizdan qolgan ma’naviy merosni qayta tiklayapmiz. Qamashining Chim mahallasida ham shunday ma’naviy muhit, shunday sharoitlar yaratilmoqda”, deydi davlat rahbari.

Prezident oliy ta’lim imkoniyatlari kengaygani, bilimli va vatanini sevadigan kadrlarni tayyorlash mamlakat kelajagi uchun zarurligini ta’kidlagan.

“Ilgari 100 nafar yoshdan atigi 9 nafari oliy ta’limda o‘qigan bo‘lsa, bugun 45 nafari o‘qiyapti. Oliygohlarni tashkil etish, professor-o‘qituvchilarga sharoit yaratish katta mehnat talab qiladi. Lekin O‘zbekistonning kelajagi uchun milliy g‘ururi bor, Vatanni sevadigan kadrlar kerak. Men sizlarga ishonaman. Jonajon Vatanimiz, Qashqadaryo vohasining kelajagi sizlarning qo‘lingizda”, deydi mamlakat yetakchisi.

Chimda aholi daromadini oshirish uchun ham yangi imkoniyatlar yaratilgan. Xotin-qizlar mehnat qilayotgan gilamchilik va kashtachilik korxonasiga 3,5 milliard so‘m sarmoya kiritilgan. Banklar ko‘magida 20 ga yaqin xonadonda umumiy maydoni 36 sotix bo‘lgan issiqxonalar tashkil etilgan, mahsulotlarni saqlash uchun 200 tonnalik muzlatkich qurilgan. Bu ishlar orqali 80 dan ortiq ishsiz fuqaroning bandligi ta’minlangan.

Shuningdek, kooperatsiya asosida limonchilik rivojlantirilmoqda. Aholiga ko‘chat, o‘g‘it va agrotexnik xizmatlar yetkazib beriladi, yetishtirilgan hosil kafolatlangan narxda sotib olinadi. Limon ko‘chatlari orasiga kartoshka, brokkoli va ko‘katlar ekilishi hisobiga daraxtlar hosilga kirguniga qadar har bir issiqxonadan qo‘shimcha 14-16 million so‘m daromad olinmoqda.

Mahallada 70 ta tadbirkor faoliyatini kengaytirgan, yana 20 ta yangi tadbirkorlik sub’ekti tashkil etilgan. Avtomagistral bo‘yidagi xizmat ko‘rsatish ob’ektlari soni 31 tadan 137 taga yetib, 200 dan ortiq yangi ish o‘rni yaratilgan. Chim va unga qo‘shni mahallalardagi 1,2 mingta xonadon kooperatsiya asosida farmatsevtika va kosmetika sanoatida qo‘llaniladigan gulxayri o‘simligini yetishtirmoqda.

Tashrif yakunida Prezident mahalla faollari va nuroniylar bilan suhbatlashgan. Ular mahalladagi o‘zgarishlar haqida o‘z fikrlarini bildirib, yurt farovonligi va yoshlar kelajagi uchun duo qilgan.