Shavkat Mirziyoyev davolanishda bo‘lgan Lola Murotovaga qo‘ng‘iroq qildi

O‘zbekiston Respublikasi Prezidenti Shavkat Mirziyoyev bugun, 5 mart kuni mamlakat xotin-qizlarining eng faol va tashabbuskor vakillaridan biri – Farg‘ona viloyati, Oltiariq tumanidagi “Nurli obod” fermer xo‘jaligining rahbari, O‘zbekiston Qahramoni, Oliy Majlis Senati a’zosi Lola Murotova bilan telefon orqali muloqotda bo‘lib, yaqinlashib kelayotgan qutlug‘ bayram bilan qizg‘in tabrikladi.

Davlat rahbari samimiy suhbat chog‘ida Lola Murotovaning mamlakat qishloq xo‘jaligi va fermerlik harakati rivojiga, joylardagi ijtimoiy muammolarni hal qilishga qo‘shayotgan beqiyos hissasini, ko‘p yillik zahmatli va halol mehnatlarini, ona-Vatan gullab-yashnashi yo‘lidagi munosib xizmatlarini alohida ta’kidlab o‘tdi. 

Lola Murotova o‘zining qirq yildan ortiq davr mobaynida boy tajribasi, butun bilimi va kuch-g‘ayratini O‘zbekiston obodligi hamda el farovonligiga safarbar etgani, shuningdek jonkuyar, kamtar va oqila o‘zbek ayoli sifatida yosh avlod va butun mamlakat xotin-qizlari uchun chinakam o‘rnak va namuna bo‘layotgani hurmat bilan qayd etildi.

Prezident hozirgi vaqtda davolanishda bo‘lgan mashhur fermerga mustahkam sihat-salomatlik va bardamlik, hamisha yaqinlari e’zozu ardog‘ida bo‘lib yurishlikni tiladi.

Lola Murotova, o‘z navbatida, Prezident Shavkat Mirziyoyevga ish jadvali tig‘iz bo‘lishiga qaramay ko‘rsatgan cheksiz g‘amxo‘rlik va qo‘llab-quvvatlashlari uchun chin qalbdan tashakkur izhor etdi.

Bunday samimiy iltifot va rag‘batni mamlakatimizning barcha ayollariga doimiy ravishda ko‘rsatib kelinayotgan yuksak ehtiromning yorqin ifodasi sifatida mamnunlik ila qabul qilishini aytib o‘tdi. 

Davlat rahbarining topshirig‘iga binoan, shu kuni Oliy Majlis Senatining raisi Tanzila Norboyeva O‘zbekiston Qahramoni Lola Murotovani qutlug‘ ayyom munosabati bilan qutlash va holidan xabar olish uchun Farg‘ona viloyatiga shaxsan tashrif buyurdi hamda Prezidentning bayram sovg‘alarini topshirdi.