Sevgilisining ma’shuqasini o‘ldirgan mahbus 2 doza o‘lim dorisidan keyin ham tirik qoldi

AQSHning Tennessi shtatida 1995 yilda qotillik sodir etgani uchun o‘lim jazosiga hukm qilingan Krista Geyl Payk ikki doza o‘limga olib keluvchi preparat yuborilganiga qaramay, tirik qoldi. 50 yoshli mahbus qatl xonasidan tez yordam mashinasida shifoxonaga olib ketildi. Bu haqda CNN xabar berdi. 

Ma’lum qilinishicha, Payk bugun, 1 oktyabr kuni soat 10:00 da qatl etilishi kerak edi. Biroq unga ikki marta pentobarbital yuborilganiga qaramay, u vafot etmagan. Qatlni kuzatgan OAV vakillarining aytishicha, Payk jarayon davomida hushyor bo‘lgan, bir payt boshini ko‘tarib, qamoqxona xodimlaridan qo‘li shunday his qilinishi kerakmi, deb so‘ragan.

Ikkinchi doza soat 20:26 da yuborilgan. Shundan keyin ham Paykning xurrak otayotgani eshitilgan. Soat 20:53 da qatl xonasidagi mikrofon o‘chirilib, OAV vakillariga hududni tark etish aytilgan.

Paykning advokatlari uning tirik qolganini tasdiqlagan. Ularning so‘zlariga ko‘ra, mahbus qamoqxonadan tez yordam mashinasida shifoxonaga olib ketilgan, biroq advokatlarga uning hozirgi ahvoli haqida ma’lumot berilmagan.

O‘lim jazosi bo‘yicha ekspertlar mazkur holatni misli ko‘rilmagan deb atagan. O‘lim jazosi haqida ma’lumot beruvchi markaz ijrochi direktori Robin Maherning aytishicha, AQSHda 7 nafar mahbus qatl jarayonida vena topilmagani sababli tibbiy muammolardan omon qolgan. Biroq hech kim o‘limga olib keluvchi preparatlar yuborilganidan keyin tirik qolmagan.

Tennessi shtatining qatl protokolida birinchi dozadan keyin mahbus vafot etmasa, ikkinchi dozani yuborish belgilangan. Biroq ikkinchi dozadan keyin ham mahbus tirik qolsa, qanday choralar ko‘rilishi protokolda ko‘rsatilmagan.

Mazkur voqeadan so‘ng Tennessi gubernatori Bill Li yil oxirigacha rejalashtirilgan barcha qatllarni to‘xtatgan. U hodisa yuzasidan “aynan nima sodir bo‘lganini aniqlash uchun uchinchi tomon ishtirokida keng qamrovli tekshiruv” o‘tkazilishini buyurganini ma’lum qilgan.

“Tennessi aholisi qatl jarayoni nafaqat qonuniy va Konstitutsiyaga mos, balki samarali tarzda amalga oshirilishini kutadi”, degan gubernator.

Tennessi Tuzatish ishlari departamenti esa qatl jarayonida shtatda belgilangan va Bosh prokuratura tomonidan tasdiqlangan barcha tartiblarga amal qilinganini bildirgan.

Payk dastlab 1 oktyabr kuni ertalab qatl etilishi kerak edi. Biroq jarayon boshlanishidan taxminan bir soat oldin AQSH Oltinchi okrug apellyatsiya sudi 2 ga qarshi 1 ovoz bilan qatlni vaqtincha to‘xtatgan. Sud Paykning bolalik davrida jinsiy zo‘ravonlikka uchragani haqidagi da’volari hukm chiqarish vaqtida yetarlicha hisobga olingan-olinmaganini ko‘rib chiqish uchun vaqt kerakligini bildirgan.

Bosh prokuratura bu qaror ustidan AQSH Oliy sudiga shikoyat qilgan. Keyinchalik Oliy sud qatlni davom ettirishga yo‘l ochgan. Suddagi 3 nafar liberal sudya qarorga qarshi chiqqan. Sudya Sonya Sotomayor Paykning da’volari chuqurroq ko‘rib chiqilishi kerakligini bildirgan.

Paykning advokatlari esa qatl jarayoni davomida uning “keraksiz azob” chekayotganini bildirib, AQSH Oliy sudiga favqulodda ariza kiritgan. Ular mahbusga hayotini saqlab qolishga qaratilgan tibbiy yordam ko‘rsatilishi kerakligini ham so‘ragan.

Ma’lumotlarga ko‘ra, Payk 1995 yil 12 yanvar kuni 19 yoshli Kolin Slemmerni o‘ldirgan. Prokurorlarning aytishicha, u Slemmerni o‘z yigitini olib qo‘yishga urinayotganidan xavotirlanib, o‘rmonzor hududga aldab olib borgan. Payk Slemmerni kanselyariya pichog‘i bilan pichoqlab, asfalt bo‘lagi bilan urgan.

Jinoyat paytida Paykning yigiti Shipp 17 yoshda bo‘lgan. U Slemmerning tanasiga pentagramma –
shaytonparastlik bilan bog‘liq yulduzsimon belgi o‘yib tushirganini tan olgan. Shipp umrbod qamoq jazosiga hukm qilingan va shartli ravishda ozodlikka chiqish imkoniyatiga ega bo‘lgan. Payk esa o‘lim jazosiga hukm qilingan.

Qotillikdan so‘ng Paykda bipolyar buzilish va travmadan keyingi stress buzilishi tashxisi qo‘yilgan. Uning tarafdorlari jinoyat sodir etgan paytda 18 yoshda bo‘lganini, ruhiy kasalligi va bolalikdagi og‘ir jinsiy zo‘ravonlik haqidagi da’volari hisobga olinishi kerakligini aytmoqda.

Payk esa qotillikni sodir etganini inkor etmaydi. U afv etish haqidagi murojaatida Slemmer bilan faqat janjallashmoqchi bo‘lganini, biroq vaziyat nazoratdan chiqib ketganini aytgan.

Slemmerning onasi Mey Martines esa Paykning o‘lim jazosi ijro etilishini o‘nlab yillardan beri kutib kelgan. U qatl jarayonini kuzatish uchun eri bilan Floridadan Tennessiga borishga tayyorlangan.

AQSH Oliy sudi 1976 yilda o‘lim jazosini qayta tiklaganidan beri mamlakatda 18 nafar ayol qatl etilgan. Bu barcha qatllarning qariyb 1 foizini tashkil etadi.

Agar Paykning qatli muvaffaqiyatli amalga oshirilganida, u joriy yilda AQSHda qatl etilgan 30-shaxs va Tennessi shtatida 200 yildan ortiq vaqt ichida qatl etilgan ilk ayol bo‘lardi.