Senat a’zolari qachon saylanishi e’lon qilindi

Oliy Majlis Senati a’zolari saylovi bo‘yicha Qoraqalpog‘iston Respublikasi, viloyatlar, Toshkent shahar hamda tuman va shaharlar mahalliy kengashlarining qo‘shma majlisi 7-12 noyabr kunlari bo‘lib o‘tadi. Bu haqda bugun, 2 noyabr kuni Markaziy saylov komissiyasining majlisida MSK raisi Zayniddin Nizomxo‘jayev ma’lum qildi.

Bildirilishicha, saylov natijalari ikki kundan kechiktirmay Markaziy saylov komissiyasiga yuborilishi zarur. Konstitutsiyaga asosan, vakolat muddati tugagach, Oliy Majlisning Qonunchilik palatasi va Senati yangi chaqiriq Qonunchilik palatasi va Senati ish boshlaguniga qadar o‘z faoliyatini davom ettirib turadi.

Senat a’zolarining saylovi Qoraqalpog‘iston Respublikasi Jo‘qorg‘i Kengesi, mahalliy kengashlar deputatlari saylanganidan keyin 1 oydan kechiktirmay o‘tkaziladi. 

Senat a’zoligiga nomzodlar ko‘rsatish Qoraqalpog‘iston Respublikasi Jo‘qorg‘i Kengesining hamda tegishli mahalliy Kengashlarining qo‘shma majlisida amalga oshiriladi. 

Eslatib o‘tamiz, oldinroq Senat Raisi Tanzila Norboyeva xalq deputatlari Toshkent shahar kengashiga saylangani xabar qilingandi.