Saratonning e’tiborsiz qoldiriladigan belgilari aytildi 

Saraton kasalligining odatda e’tiborsiz qoldiriladigan dastlabki alomatlari mavjud. Bu haqda tibbiyot fanlari doktori Mixail Davidov ma’lumot berdi. 

Mutaxassisga ko‘ra, e’tibor bermaslik xato bo‘ladigan birinchi narsa — bir oydan ortiq davom etuvchi muntazam yo‘tal. Bu bronxit yoki mavsumiy kasallik bo‘lishi mumkin, ammo bemorda o‘pka saratoni yoki bosh va bo‘yin o‘simtalari ham bo‘lishi mumkin. Ayniqsa, yo‘tal qon ketishi bilan
kechsa, darhol shifokorga murojaat qilish kerak. 

Ovoz tembrining o‘zgarishi, bo‘g‘ilish yoki xirillash limfa tugunlari yoki halqumning shikastlanishini ko‘rsatishi mumkin. Og‘izdagi yaralar ham shifokorga murojaat qilish uchun sabab bo‘ladi. 

Ro‘yxatdagi uchinchi alomat — uzoq muddatli ovqat hazm qilish muammolari. Shuningdek, yo‘g‘on ichakda o‘simta bo‘lsa, doimiy diareya yoki ich qotishi kuzatilishi mumkin. 

“Bunday vaziyatlarda imkon qadar tezroq shifokorga murojaat qilish va kolonoskopiya qildirish kerak, bu ichaklarni batafsil tekshirish imkonini beradi”, deb ogohlantirgan Davidov. 

Uning qo‘shimcha qilishicha, 40 yoshdan keyin bunday tekshiruv har yili o‘tkazilishi kerak — bu saratonni erta bosqichda aniqlashning yagona yo‘li. 

Bundan tashqari, siydik chastotasi, siydikni ushlab turish va boshqa shunga o‘xshash hodisalardagi o‘zgarishlarni kuzatish muhimdir — bu prostata yoki siydik pufagi saratonini ko‘rsatishi mumkin. 

Shifokor xavfli alomatlar ro‘yxatiga muntazam ravishda jig‘ildon qaynashi, yutishga  qiynalishni ham kiritgan. Ular qizilo‘ngach yoki oshqozon saratonini ko‘rsatishi mumkin. 

Tuxumdon yoki bachadon saratoni bilan bemorlarda bel yoki tos bo‘shlig‘ida og‘riqlar, ovqatni hazm qila olmaslik kuzatilishi mumkin. 

Ta’kidlanishicha, deyarli har qanday saraton bir oy davom etadigan limfa tugunlaridagi o‘zgarishlar bilan ko‘rsatilishi mumkin. Davidov doimiy charchoq, tungi isitma, terlash, to‘satdan vazn yo‘qotish va doimiy bosh og‘rig‘ini ham e’tiborsiz qoldirmaslikka chaqirgan.