Samarqandda jigar transplantatsiyasi o‘tkazildi. Bemor ham, donor ham vafot etdi

3-sahifa 53447
image

Samarqandda ilk bor jigar transplantatsiyasi amaliyoti o‘tkazildi va bir hafta o‘tar-o‘tmas bemor ham, donor ham vafot etdi. Bu haqdagi xabarlarni QALAMPIR.UZ’ga Samarqand viloyati sog‘liqni saqlash boshqarmasi Axborot xizmati tasdiqladi.

Ma’lum qilinishicha, joriy yil 9 avgust kuni viloyat ko‘p tarmoqli tibbiyot markazi transplantologlari tomonidan hududda ilk bor o‘ta murakkab va noyob operatsiya hisoblangan jigar ko‘chirib o‘tkazish amaliyoti bajarilgan. Bu jarayonda jigar sirrozi, subkompensatsiya bosqichi bilan kasallangan og‘ir ahvoldagi 57 yoshli bemorga 35 yoshli qizi donorlik qilgan.

So‘nggi 4 yilda bemorning ahvoli og‘irlashib, bir necha marotaba viloyat ko‘p tarmoqli tibbiyot markazida jigar sirrozi kasalligidan davolangan. Ammo salomatligi borgan sari yomonlashishi tufayli u joriy yil 27 iyul kuni jarrohlik bo‘limiga yotqizilgan. Bemorda standart asosida bajarilgan tekshiruvlardan keyin operatsiyaoldi konservativ terapiyasi o‘tkazilgan.

“Jigar transplantatsiyasidan avval bemor, donor va uning qarindoshlari bilan birgalikda qonunchilikda belgilangan va qonunosti hujjatlarida ko‘rsatilgan standartlar asosida ish yuritilgan.  

13 soatu 20 daqiqa davom etgan jarrohlik amaliyotidan so‘ng bemor reanimatsiya bo‘limiga o‘tkazilib, intensiv davo muolajalari davom ettirilgan. Biroq dastlabki tahlillarga qaraganda, stabil og‘ir ahvoldagi ushbu fuqaro 12 avgustda o‘tkir yurak-qon tomirlari yetishmovchiligi tufayli vafot etgan”, deyiladi Samarqand viloyati sog‘liqni saqlash boshqarmasi xabarida.

Ta’kidlanishicha, bemorga donorlik qilgan 35 yoshli qizi standart asosida tekshirilib, transplantatsiya qilingan. Operatsiyadan so‘ng unda intensiv davo muolajalari olib borilgan. 

“Ammo donorda buyrak yetishmovchiligi, ikki tomonlama zotiljam asorati kuzatilib, standart bo‘yicha intensiv davo choralari qo‘llanilgan. Shunga qaramay, umumiy holati yaxshilanib borayotgan bemorning ahvoli 16 avgust kuni birdan yomonlashib, yurak urishi to‘xtagan. Reanimatsion tadbirlar o‘tkazilishiga qaramasdan, unda biologik o‘lim kuzatilgan”, deyiladi ma’lumotda. 

Mutaxassislarning ta’kidlashicha, donorda o‘pka tomirlarining tromboemboliyasi asorati kuzatilganligi gumon qilingan.

Hozir mazkur holat yuzasidan huquq-tartibot idoralari xodimlari tomonidan tergov-surishtiruv ishlari olib borilmoqda. 

Qalampir.uz Tahririyati
Maqolaga baho bering
Baholaganlar: 3229
Reyting: 3
t
×