Samarqandda rasmlari internetga tarqatilgan kelin o‘zini osib qo‘ydi

Joriy yilning 3 mart kuni Samarqandda 2004 yilda tug‘ilgan ayol o‘zini osib qo‘ydi. Bu haqda Bosh prokuratura matbuot kotibi Hayot Shamsutdinov QALAMPIR.UZ'ga ma’lum qildi.

Urgut tumani “Tersak” mahallasida yashovchi 19 yoshli A.S. shu mahallada joylashgan ota-onasining xonadonida noma’lum sabablarga ko‘ra o‘z joniga qasd qilib, arqon yordamida o‘zini osgan. Oqibatda u voqea joyida vafot etgan.

Marhumaning o‘limi sabablarini aniqlash maqsadida shu kuni sud tibbiyot ekspertizasi tayinlangan.

Sud tibbiyot ekspertizasining xulosasida A.S.ning o‘limi osilishda bo‘yin a’zolarini sirtmoq bilan qisilishi oqibatidagi mexanik asfiksiyadan kelib chiqqani ko‘rsatilgan.

Shu bilan birga, marhuma A.S.ning turmush o‘rtog‘i S.S. o‘z telefonida saqlangan Telegram messenjerida tashkil etilgan kanalga marhuma turmush o‘rtog‘ining fotosuratini taqdim etgan.

Mazkur fotosurat ko‘zdan kechirilganda, qayd etilgan kanal nomlanishidan behayolik va odobsizlikdan dalolat bersada, fotosuratdagi qizlarning kiyim-kechagi mavjud bo‘lib, obro‘sizlantirish, kamsitish yoki ahloq-odob normalariga zid keluvchi belgilar hamda fotosurat ostida biron yozuv, izoh yoki havolalar mavjudligi aniqlanmagan.

Tergovga qadar tekshiruv natijasiga ko‘ra, biron bir kishining harakatida jinoyat tarkibi va jinoiy hodisa aniqlanmagani bois 2023 yil 1 aprel kuni jinoyat ishi qo‘zg‘atishni rad qilish to‘g‘risida qaror qabul qilingan.