Samarqandda bir tup chinor kesgan fuqaro tabiatga 115 mln so‘m zarar yetkazdi

Samarqand viloyatida chinor  kesgan fuqaro tabiatga 115 125 000 so‘m zarar yetkazdi. Bu haqda viloyat ekologiya boshqarmasi matbuot xizmati xabar berdi.

Qayd etilishicha, Toyloq tumani “Xo‘jayuz” MFYda joylashgan  mahalla hovuzi atrofidagi bir tup ko‘p yillik o‘sib turgan chinor daraxti shu mahallada yashovchi fuqaro S.R. tomonidan hech bir ruxsatlarsiz noqonuniy ravishda kesib tashlagani aniqlangan.

Tuman Ekologiya, atrof-muhitni muhofaza qilish va iqlim o‘zgarishi inspeksiyasi davlat inspektorlari tomonidan olib borilgan tezkor o‘rganishlar jarayonida huquqbuzar fuqaro daraxtni noqonuniy tarzda kesib tashlashi oqibatida tabiatga 115 125 000 so‘m zarar yetkazgan.

Mazkur holatda o‘simlik dunyosiga yetkazilgan zarar miqdorida jinoyat alomatlari borligi sababli aybdor shaxslarga nisbatan qonun talablariga muvofiq tegishli hujjatlar rasmiylashtirilib, huquqni muhofaza qiluvchi organlariga taqdim etilgan.

Eslatib o‘tamiz, avvalroq Jizzax viloyati Do‘stlik tumanida fuqaro 13 tup tut daraxti kesib, tabiatga 738 million 750 ming so‘m zarar yetkazgani aniqlangandi.