Rossiyaning Il-76 harbiy-transport samolyoti halokatga uchradi (video)

Rossiyaning Ivanovo viloyatida bortida 15 kishi bo‘lgan Il-76 harbiy-transport samolyoti halokatga uchradi, bu haqda Rossiya Mudofaa vazirligiga tayanib, “Interfaks” xabar berdi.

"12 mart kuni taxminan soat 13:00 da Ivanovo viloyatida Il-76 harbiy-transport samolyoti rejalashtirilgan reysga ko‘tarilayotganda halokatga uchradi. Bortda sakkiz nafar ekipaj a’zosi va yetti nafar yo‘lovchi bo‘lgan", deyiladi vazirlik bayonotida.

Voqea joyidan olingan xabarga ko‘ra, falokatga samolyotning ko‘tarilishi vaqtida dvigatellardan birida yong‘in kelib chiqqani sabab bo‘lgan. 

Bildirilishicha, Rossiya Aerokosmik kuchlari bosh qo‘mondonligi komissiyasi samolyot halokati sabablarini aniqlash uchun Ivanovo aerodromiga jo‘nab ketgan.

Ma’lumot uchun, Il-76 harbiy transport samolyoti qo‘nish, shaxsiy tarkib, yuk va harbiy texnikani tashish uchun mo‘ljallangan. 126 parashyutchini parashyutlar bilan, bir qavatli versiyada 145 nafar va ikki qavatli versiyada 225 nafar xodimni tashishga qodir. Maksimal foydali yuk 48 tonna, 40 tonna yuk bilan parvoz masofasi 4750 km.

Eslatib o‘tamiz, o‘tgan oyda Rossiya tarkibidagi Kareliya respublikasida Mi-8 vertolyoti Onega ko‘li uzra parvoz paytida halokatga uchragandi.