Rossiyaga tashrifini erta tugatgan Aliyev Putinga qo‘ng‘iroq qildi

Aqtauda Ozarbayjon laynerining halokatga uchrashi sababli Rossiya Federatsiyasiga tashrifini to‘xtatgan Ozarbayjon Prezidenti Ilhom Aliyev Rossiya rahbari Vladimir Putinga telefon qildi. Bu haqda Aliyevning matbuot xizmati xabar berdi.

“Bakuga qaytayotgan samolyot bortida Ilhom Aliyev Rossiya Prezidenti Vladimir Putinga qo‘ng‘iroq qildi. Davlat rahbari Baku-Grozniy yo‘nalishi bo‘yicha parvoz qilayotgan yo‘lovchi samolyoti halokatga uchragani uchun u Sankt-Peterburgda bo‘lib o‘tadigan MDH davlatlari rahbarlarining norasmiy uchrashuvida ishtirok eta olmasligini va Bakuga qaytishga qaror qilganini aytdi”, deyiladi matbuot xizmati xabarida.

Shuningdek, Rossiya Prezidenti Vladimir Putin Ozarbayjon, Rossiya va boshqa davlatlar  fuqarolari bo‘lgan aviahalokatda  halok bo‘lganlar va jarohatlanganlarning yaqinlariga hamdardlik bildirib, barcha jabrlanganlarga tezroq shifo topishini tiladi.

Eslatib o‘tamiz, bugun, 25 dekabr kuni Ozarbayjon aviakompaniyasining Baku-Grozniy reysi bo‘yicha uchayotgan samolyoti Qozog‘istonda halokatga uchragandi. Ozarbayjon Prezidenti Ilhom Aliyev ushbu aviahalokat munosabati bilan MDHning norasmiy sammitidan Rossiyadan Bakuga qaytishi haqida xabar berilgandi.