Rossiya Zaporojedagi ko‘prikka zarba berdi 

Rossiya harbiylari bugun, 6 oktyabrga o‘tar kechasi Zaporoje shahridagi Dnepr daryosi orqali o‘tgan ko‘priklardan biriga zarba berdi. Bu haqda Zaporoje viloyati harbiy ma’muriyati rahbari vazifasini bajaruvchi Mixail Semikin ma’lum qildi.

Uning ma’lumotlariga ko‘ra, hujum oqibatida besh kishi jarohat olgan: xizmatga ketayotgan Qizil xoch jamiyatining ikki xodimi, shuningdek, ikki ayol va bir erkak. Yo‘l qoplamasining shikastlangani sababli ko‘prikdagi harakat vaqtincha yopilgan. Semikin tomonidan joylashtirilgan suratda aylana shaklidagi chuqur aniq ko‘rinib turibdi. 

“Zaporoje aholisidan cheklovlarni hisobga olishlarini va rasmiy ma’lumotlarni kuzatib borishlarini so‘rayman”, deydi Semikin.

Ukraina Favqulodda vaziyatlar bo‘yicha davlat xizmati ma’lumotlariga ko‘ra, Zaporojeda 5 oktyabr kuni kechqurun Rossiya hujumi paytida dron to‘qqiz qavatli turarjoy binosiga borib tushgan. Beshinchi qavatdagi xonadon va ortiqcha oltinchi qavatdagi balkon yonib ketgan. Ikki kishi tan jarohati olgan.

Kiyevda 6 oktyabrga o‘tar kechasi berilgan Rossiya zarbasi oqibatida Obolon tumanidagi o‘quv muassasasining tomi yonib ketgan. Jarohatlanganlar yo‘q.

Qayd etish joiz, bundan oldin Rossiya armiyasi Kiyevdagi Dnepr orqali o‘tgan ko‘priklarga zarba berishni boshlagan edi. 1 oktyabr kuni Ukraina poytaxtidagi Janubiy ko‘prikka ikkita dron orqali birinchi zarba berildi. Keyingi sutka davomida o‘tish joyi yana ikkita zarba beruvchi dron hujumiga uchradi. 3 oktyabr kuni Kiyevdagi Shimoliy ko‘prik Rossiyaning reaktiv dronlari nishoniga aylandi. Ushbu ko‘prikka 4 oktyabr kuni ham dronlar zarba bergan edi. Barcha holatlarda o‘tish joylari, jumladan, yo‘l qoplamasi shikastlandi. Ko‘priklar bo‘ylab harakatlanish yopilib, bu Kiyev yo‘llarida tirbandliklarga olib keldi. Rossiya Mudofaa vazirligi hujumlarni tasdiqlab, ko‘priklar Donetsk viloyatidagi Ukraina armiyasiga qo‘shinlarni ko‘chirish va harbiy yuklarni yetkazib berishni ta’minlab berayotganini da’vo qildi.

Eslatib o‘tamiz, avvalroq Rossiyaning Moskva viloyatiga tunda Ukraina Qurolli kuchlarining dronlari hujum qilishi oqibatida 2 kishi halok bo‘lgani, 6 kishi jarohatlangani haqida xabar berilgan edi.