Rossiya Ukrainadagi maqsadlariga hali erisha olmadi – Putin

Rossiya Ukrainadagi maqsadlariga hali erisha olmadi. Bu fikrni Rossiya Prezidenti Vladimir Putin amerikalik jurnalist Taker Karlsonga bergan intervyusida bildirdi.

“Yo‘q, biz hali o‘z oldimizga qo‘ygan maqsadlarga erishganimiz yo‘q, chunki maqsadlardan biri denasifikatsiyadir. Bu neonatsistlarning barcha harakatlarini taqiqlashni anglatadi”, deydi Putin.

Taker Rossiya Prezidentidan o‘zi nazorat qilmaydigan mamlakatda (Ukrainada) qanday qilib mafkura, madaniyat, ba’zi his-tuyg‘ularni, tarixni yulib tashlashi mumkinligini so‘ragan.

Bunga javoban Putin Istanbuldagi muzokaralar chog‘ida Ukrainada neonatsizm o‘stirilmaydi, degan kelishuvga erishilganini va u yerda qonunchilik darajasida taqiqlanishini aytgan.

“Buni muzokaralar jarayonida amalga oshirish mumkin ekan. Bu yerda Ukrainani zamonaviy sivilizatsiyalashgan davlat sifatida kamsitadigan hech narsa yo‘q. Har qanday davlat natsistlar tashviqotini targ‘ib qilishga ruxsat beradimi? Yo‘q”, degan Putin.

Uning so‘zlariga ko‘ra, bu Rossiya 2022 yilda Istanbuldagi muzokaralar chog‘ida muhokama qilgan muammolardan biridir.

“Bizga hujjatlarni yakuniy imzolash uchun shart-sharoit yaratish zarurligi aytildi. Fransiya va Germaniyadagi hamkasblarim biz qo‘shinlarni Kiyevdan olib chiqishimizni ta’kidlayapti. Xo‘p, yaxshi. Biz qo‘shinlarimizni Kiyevdan olib chiqdik. Kiyevdan qo‘shinlarimizni olib chiqishimiz bilan ukrainalik muzokarachilarimiz Istanbulda erishilgan barcha kelishuvlarimizni darhol “axlatga tashladi” va AQSH va uning Yevropadagi sun’iy yo‘ldoshlari yordamida uzoq davom etadigan qurolli to‘qnashuvga tayyorlanishdi. Mana, vaziyat qanday rivojlandi”, deydi Putin.