Rossiya migrant bolalarning qanchasini maktabga qabul qilmagani ma’lum bo‘ldi

Rossiya maktablari migrant bolalarning 87 foizini, asosan, rus tili imtihoniga kirish uchun hujjatlar bilan bog‘liq muammolar tufayli o‘qishga qabul qilishdan bosh tortdi. Bu haqda “The Moscow Times” xabar berdi.

Nashrga ko‘ra, joriy yil apreldan avgustgacha bo‘lgan davrda 23 ming 616 nafar voyaga yetmagan xorijliklarning ota-onalari bolalari o‘qishi uchun ariza topshirgan. Biroq hujjatlarning to‘liq to‘plami faqat 8223 nafar bola uchun topshirilgan. Natijada test sinovlarida 5940 nafar bola qatnashgan, “2964 nafari uni muvaffaqiyatli yakunlagan” yoki umumiy abituriyentlar sonining 12,6 foizini tashkil etgan.

Rossiyada 2025 yil 1 apreldan boshlab maktablarga kirishda chet ellik bolalar uchun rus tilidan majburiy imtihon joriy etildi. Muvaffaqiyatli o‘qishga kirish uchun savollarning 90 foiziga to‘g‘ri javob berish kerak. Aniqlik kiritilishicha, testlar har bir sinfdagi bilim darajasini hisobga olgan holda ishlab chiqilgan. Birinchi sinf o‘quvchilarining og‘zaki nutqi, tushunish, asosiy leksik va grammatik ko‘nikmalari sinovdan o‘tkaziladi. Ikkinchi sinfdan boshlab o‘qish va yozish topshiriqlarga kiritiladi. Rasmiylarga ko‘ra, sinovning maqsadi bolaning joriy ta’lim dasturlari doirasida rus tilini o‘rganish qobiliyatini baholashdir.

Shu bilan birga, farzandlarini rus maktablariga bermoqchi bo‘lgan xorijliklardan ham bir qator hujjatlar talab qilinadi. Agar ota-onaning qarindoshligi yoki uning manfaatlarini himoya qilish huquqi bo‘lsa, bolani ro‘yxatga olish mumkin. Bundan tashqari, ular butun oilaning Rossiyada bo‘lishining qonuniyligi to‘g‘risidagi hujjatlarni, arizachida xavfli yuqumli kasalliklar yo‘qligi to‘g‘risidagi tibbiy ma’lumotnomani va ularning pasportlarini taqdim etishi kerak. Barcha nusxalar rus tilida bo‘lishi yoki notarial tasdiqlangan tarjimasi bilan birga bo‘lishi kerak. Agar hujjatlar to‘liq bo‘lmasa, maktablar arizani ko‘rib chiqmasdan qaytaradi.

Avgust oyida Davlat dumasiga Rossiya maktablarida xorijliklar uchun ta’limning tijorat shaklini joriy etish to‘g‘risidagi qonun loyihasi kiritildi. Shuningdek, deputatlar rus tili imtihonidan o‘tish uchun bepul urinishlar sonini cheklashni taklif qildi. Tushuntirish xatida qayd etilishicha, qonun maktablarda “900 ming o‘rin yetishmasligi” muammosini hal qilishga yordam beradi. Mualliflarning ta’kidlashicha, Rossiyada yashovchi 638 mingdan ortiq voyaga etmagan migrantlarning atigi 181 ming nafari o‘qimoqda.

Davlat dumasining Mehnat, ijtimoiy siyosat va faxriylar ishlari bo‘yicha qo‘mitasi raisi Yaroslav Nilov 2024 yilning sentyabr oyida Rossiya fuqaroligi bo‘lmagan shaxslarning bolalari uchun bog‘cha va maktablarda bepul ta’lim olishni bekor qiluvchi qonun loyihasini ishlab chiqqandi. Qonun loyihasida “Rossiya Federatsiyasi ta’lim to‘g‘risida”gi qonuniga o‘zgartirish kiritish taklif qilingandi. Unga ko‘ra, chet ellik bolalar uchun maktabgacha, boshlang‘ich umumiy, asosiy umumiy va o‘rta umumiy ta’lim pulli asosda amalga oshiriladi. Hozir ularning barchasi bepul asosda ta’lim olmoqda.

Eslatib o‘tamiz, avvalroq Rossiya Ta’lim vazirligining Davlat umumiy ta’lim siyosati va maktabgacha ta’limni rivojlantirish bo‘yicha departamenti rahbari Aleksandr Reut chet ellik mehnat migrantlarining bolalari uchun maktab ta’limini pulli qilish taklifiga qarshi chiqqandi.