Rossiya xalq artisti Nina Urgant vafot etdi

Bugun, 3 dekabr kuni teatr va kino aktrisasi, Rossiya xalq artisti Nina Urgant vafot etdi. U 92 yoshda edi. Bu haqda TASS yozmoqda.  

U 1929 yil 4 sentyabrda Luga shahrida tug‘ilgan. 

Ikkinchi jahon urushi yillarida Nina Urgant onasi bilan bosib olingan hozirgi Latviya Respublikasida yashagan. Urushdan keyin oila Leningradga ko‘chib o‘tgan. Maktab yillarida u havaskorlar teatr studiyalari spektakllarida qatnashgan – qo‘shiq kuylagan va gitara chalgan. 

1953 yilda Nina Urgant A.N.Ostrovskiy nomidagi Leningrad teatr instituti (hozirgi Rossiya davlat san’at instituti)ni tamomlagan. 

1953-1954 yillarda hozirgi Rossiya davlat akademik drama teatrida faoliyat yuritgan. 

1954-1962 yillarda u Leningrad teatrida xizmat qilgan. 

1962 yildan 2021 yilgacha Nina Urgant Rossiya Milliy drama teatrida ishlagan. U 30 dan ortiq spektakllarda rollar ijro etgan. 

Nina Urgant kino aktrisasi sifatida keng tanilgan. U 50 dan ortiq film va seriallarda rol ijro etgan. 

U Rossiya Federatsiyasi Kinematograflar uyushmasining a’zosi edi. 

U uch marta turmushga chiqdi. Birinchi turmush o‘rtog‘i – aktyor Lev Milinder (1930-2005). U bilan nikohdan o‘g‘li Andrey Urgant dunyoga kelgan. Nabirasi – shoumen,  teleboshlovchi Ivan Urgant (1978 yilda tug‘ilgan). Nina Urgantning ikkinchi eri aktyor Gennadiy Voropayev (1931-2001), uchinchisi – xoreograf Kirill Laskari (1936-2009).