Rossiya Fransiyaga gaz sotishni to‘xtatadi

Olam 10367
image

Rossiyaning “Gazprom” kompaniyasi 1 sentyabrdan Fransiyaning Engie energetika konserniga tabiiy gaz yetkazib berishni to‘xtatadi. Kecha, 30 avgust kuni kechqurun “Gazprom eksport” MCHJ amaldagi shartnomalar bo‘yicha iyul oyida fransuz tomoniga yetkazib berilgan xomashyo uchun to‘liq to‘lovlarni olmagan, deya izoh bergan Rossiya kompaniyasi.

“Gazprom”ning qarori “yetkazib berilgan gaz uchun mablag‘lar to‘liq olinmaguncha” kuchda qoladi.

Ayni paytda Fransiya rasmiylari Rossiyadan gaz yetkazib berish kamayganini keskin tanqid qildi. Rossiya gazdan qurol sifatida foydalanayotgani aniq, deydi Fransiya Energetika vaziri Anes Pane-Ryunashe 30 avgust kuni “Inter” radiosiga.

Uning so‘zlariga ko‘ra, Fransiya eng yomon ssenariyga — qishgacha Rossiya gazini yetkazib berishni to‘liq to‘xtatishga tayyorlanmoqda. Avvalroq, o‘sha kuni Engie vakillari “Gazprom”ning “shartnomalar bo‘yicha kelishmovchiliklar” tufayli gaz ta’minotini qisqartirishini kutganini aytishgan.

Energetika vazirligi rahbari Fransiyadagi gaz omborlari 90 foizdan ortiq to‘lganini, mamlakatdagi gaz zaxiralari esa “oddiy” qishdan omon qolish uchun yetarli ekanligini qo‘shimcha qildi. Uning so‘zlariga ko‘ra, mamlakat uchun odatiy bo‘lmagan sovuq ob-havo sharoitida omon qolish uchun elektr energiyasi va gaz iste’molini kamaytirish kerak. Fransiya Bosh vaziri Elizabet Borne 29 avgust kuni kompaniyalarni oktyabrgacha energiyani tejash rejalarini tayyorlashga chaqirib, tanqislik yuzaga kelganda birinchi bo‘lib sanoat korxonalari zarar ko‘rishini ta’kidladi, chunki rasmiylarning gaz va elektr energiyasini taqsimlashdan boshqa chorasi qolmaydi.

Rossiyaning Ukrainaga qarshi keng ko‘lamli harbiy agressiyasi boshlanganidan beri Fransiyaning Engie kompaniyasiga gaz yetkazib berish keskin kamaydi. Bir kun avval Engie vakillari Jazoirning Sonatrach kompaniyasi bilan Fransiyaga energiya yetkazib berish hajmini oshirish bo‘yicha muzokaralar olib borilganini tasdiqladi. Urushdan oldin Fransiya mamlakatda iste’mol qilinadigan tabiiy gazning taxminan 17 foizini Rossiya Federatsiyasidan sotib olgan.

Sunnatilla Abdullayev
Maqolaga baho bering
Baholaganlar: 381
Reyting: 3
Teglar
t
×