Ronaldu yana Yevropa Chempionlar ligasida o‘ynashi mumkin
Sport
−
15 noyabr 2023 8497
Yevropa futbol assotsiatsiyalari ittifoqi (UEFA) Saudiya Arabistonining “Al-Nasr” klubini 2024/2025 yilgi mavsumda Yevropa Chempionlar ligasida ishtirok etishga taklif qilishni rejalashtirmoqda. Bu haqda futbol jurnalisti Ali Al-Harbi o‘z X sahifasida ma’lum qildi.
Unga ko‘ra, UEFA rahbariyati Saudiya klubini portugaliyalik hujumchi Krishtianu Ronaldu to‘p surayotgan jamoa ancha kuchli bo‘lgani uchun ligaga taklif qilishdan manfaatdor.
Shuningdek, OAVda Saudiya futbol federatsiyasi 2024/2025 yilgi mavsumda Yevropa Chempionlar ligasida ishtirok etish uchun maxsus taklifnoma olish so‘rovi bilan UEFA'ga murojaat qilishni rejalashtirgani haqida xabarlar paydo bo‘ldi.
UEFA ham o‘tgan yili 2024 yildan boshlab turnir formati o‘zgarishini e’lon qildi. Jamoalar soni 32 tadan 36 taga ko‘payadi, guruh bosqichi esa yagona ligaga almashtiriladi. Har bir klub sakkiz xil jamoaga qarshi o‘yinda maydonga tushadi. Bahslar uy-safar tizimida o‘tkaziladi.
