Ronaldu qanday futbolchilarni yoqtirmasligi ma’lum bo‘ldi

“Al-Nasr” va Portugaliya terma jamoasi hujumchisi Krishtianu Ronaldu Portugaliya terma jamoasida o‘ynashdan bosh tortayotgan futbolchilarni yoqtirmaydi. Bu haqda u futbol federatsiyasi matbuot xizmatiga bergan intervyusida aytdi.

“Portugaliya terma jamoasida o‘ynashni istamaydigan ba’zi futbolchilar meni g‘azablantirmoqda. Milliy terma jamoada o‘ynashdan rohatlaning, vaqt tez o‘tadi! O‘z mamlakatingiz va madaniyatingizni namoyish etishdan ko‘ra yaxshiroq narsa yo‘q”, deydi Ronaldu.

Terma jamoa tarkibida Ronaldu Yevropa chempionati va UEFA Millatlar ligasida g‘olib chiqqan. Portugaliyada u to‘rt marta yilning eng yaxshi futbolchisi deb topilgan, shuningdek, Krishtianu Portugaliya terma jamoasi va barcha terma jamoalar tarixidagi eng yaxshi to‘purar (130 ta gol) hisoblanadi.

Joriy mavsumda Krishtianu Ronaldu “Al-Nasr” safida barcha musobaqalarda 15 ta o‘yinda ishtirok etib,  10 ta gol va 3 ta golli uzatmaga mualliflik qildi. Futbolchining klub bilan amaldagi shartnomasi 2025 yilning yoziga qadar mo‘ljallangan. “Transfermarkt” portalida berilgan ma’lumotlarga ko‘ra, futbolchining bozor qiymati 15 million yevroni tashkil qiladi.