Rimda Ukrainaga 10 mlrd yevro va’da qilishdi

10-11 iyul kunlari Rimda bo‘lib o‘tayotgan Ukrainani urushdan keyingi qayta tiklash bo‘yicha 4-xalqaro konferensiya ishtirokchilari Kiyevga yordam berish uchun 10 milliard yevrodan ortiq mablag‘ ajratishga va’da berdi. Bu haqda bugun, 10 iyul kuni Italiya Bosh vaziri Jorjiya Meloni ma’lum qildi.

“O‘ylaymanki, biz bugun erishgan natijamiz – mamlakatlar, xalqaro tashkilotlar, moliya institutlari, mahalliy hokimiyat organlari, biznes sektori va fuqarolik jamiyati bilan faxrlanishimiz kerak. Bugungi konferensiyada birgalikda biz 10 milliard yevrodan ortiq majburiyatlarni oldik”, dedi Meloni.

Jorjiya Meloni rossiyalik harbiylar tomonidan Ukraina cherkovlari va muzeylari vayron qilinganini keskin tanqid qildi.

“Bu madaniy qadriyatlar umumiy Yevropa merosining bir qismidir va qayta tiklanadi”, deb va’da berdi Italiya Bosh vaziri.

O‘z navbatida, 10 iyul kuni Yevroparlamentdan ishonch votumini olgan Yevrokomissiya prezidenti Ursula fon der Lyayen ham Ukrainaga har tomonlama moliyaviy yordam va’da qilgan edi.

“Ukraina mudofaa sanoati o‘z salohiyatining atigi 60 foizida ishlamoqda”, deya qo‘shimcha qildi u.

Fon der Lyayen Yevropa kompaniyalari unga kapital bilan yordam berishi mumkinligiga ishonch bildirdi. U Ukrainani qayta tiklash bo‘yicha yangi Yevropa jamg‘armasi tashkil etilishini e’lon qildi. Fond xususiy mablag‘larni jalb qilishi kerak.

Rimdagi konferensiyada ishtirok etayotgan Ukraina Prezidenti Vladimir Zelenskiy G‘arb davlatlarini dronlarni yaratish va ishlab chiqarishda hamkorlik qilishga chaqirdi.

“Bu oldingi chiziqni ushlab turishga va Rossiya harbiy ob’ektlariga hujum qilishga yordam beradi”, dedi Zelenskiy.

U yana muzlatilgan Rossiya davlat aktivlaridan Ukrainani tiklash uchun foydalanishga chaqirdi.

“Kiyev kelayotgan qish uchun energiya ta’minoti va havo mudofaasini ta’minlash uchun xalqaro yordamga muhtoj”, deya qo‘shimcha qildi Ukraina davlati rahbari.

Rimdagi konferensiyada 20 dan ortiq hukumat va 100 dan ortiq kompaniya vakillari ishtirok etmoqda. Bir kun avval Italiya poytaxtida Yevropa uchun Jahon iqtisodiy komissiyasi shafeligida UN4UkrainianCities (“Ukraina shaharlari uchun BMT”) tashabbusi doirasida Xarkov va Nikolayevni jonlantirish loyihalari muhokamasi bo‘lib o‘tdi. Forumda Xarkov merlari Igor Terexov va Nikolay Oleksandr Senkevich, shuningdek, xalqaro tuzilmalar vakillari ishtirok etdi.