“Real Madrid” YeCHLning qirolidir – Gvardiola

“Real Madrid” klubi Yevropa Chempionlar ligasining qirolidir. “Manchester Siti” bosh murabbiyi Xosep Gvardiola YeCHL chorak final javob uchrashuvidan keyin shunday fikr bildirdi, deb xabar berdi “Marca” nashri.

Shuningdek, Gvardiolaning qo‘shimcha qilishicha, agar, “Manchester Siti” “Real”ga qarshi kecha, 13 aprel kuni “Atletiko” bilan o‘yinning ikkinchi bo‘limidagidek futbol namoyish qilsa, Madrid klubi “shaharliklar”ga hech qanday imkoniyat qoldirmaydi.

“Ular (“Real Madrid”) ushbu turnirning qirolidir. Biz uchun bu Chempionlar ligasidagi uchinchi yarim final hisoblanadi. Ammo “Atletiko” bilan uchrashuvning ikkinchi bo‘limidagidek o‘ynasak, “Real”ga qarshi hech qanday imkoniyatimiz qolmaydi. Biz Manchesterdagi birinchi o‘yinda qanday o‘ynagan bo‘lsak, shunday o‘ynashimiz kerak va yuzaga kelgan har imkoniyatdan foydalanishimiz zarur. Biz “Liverpul”ga qarshi o‘yindan keyin Ispaniyaga keldik va tayyorgarlik ko‘rishga ulgurmadik. "Atletiko" juda yaxshi ko‘rindi. Bu o‘yin juda qiyin edi, lekin biz chidadik”, degan “Manchester Siti” bosh murabbiyi.

Ma’lumot o‘rnida, kecha, 13 aprel kuni YeCHL chorak final bahslariga yakun yasaldi. “Atletiko” o‘z maydonida “Manchester Siti”ni qabul qildi. Ushbu bahsda hisob ochilmagan bo‘lsa-da, dastlabki o‘yindagi g‘alaba evaziga “Manchester Siti” yarim finalga yo‘l oldi. “Shaharliklar”ning yarim finaldagi raqibi Madridning “Real” klubi bo‘ladi. Ular o‘rtasidagi birinchi uchrashuv joriy yilning 26 aprel sanasiga belgilangan.

Shuningdek, javob uchrashuvida “Benfika” bilan jangovar 3-3 hisobida durrang qayd etgan “Liverpul” ham yarim finalga yo‘l oldi. “Qizillar” yarim finalda Ispaniyaning boshqa bir jamoasi “Vilyarreal” bilan kurash olib boradi. Ular o‘rtasidagi dastlabki uchrashuv 25 aprel kuni bo‘lib o‘tadi.

Ma’ruf Abdumalikov