“Real Madrid” “Olimpiakos”ni mag‘lub etdi

Kecha, 26 noyabr kuni UEFA Chempionlar Ligasi 5-tur doirasida “Olimpiakos” va “Real Madrid” o‘rtasida qiziqarli uchrashuv bo‘lib o‘tdi. Madridliklar safarda 4:3 hisobida g‘alaba qozonib, yunon jamoasining o‘z maydonidagi ketma-ket 10 ta Yevropa uchrashuvidagi mag‘lubiyatsiz seriyasiga barham berdi.

Uchrashuv boshida tashabbus “Real Madrid” tomonida bo‘lsa-da, hisobni kutilmaganda mezbonlar ochdi. 8-daqiqada Chikino tezkor hujum yakunida to‘pni darvozaga yo‘llab, “Olimpiakos”ni oldinga olib chiqdi. 22-daqiqada esa Vinisius Juniorning aniq uzatmasidan keyin Kilian Mbappe hisobni tenglashtirdi. Fransiyalik yulduz buning ortidan 24 va 29-daqiqalarda yana ikkita gol urib, ilk bo‘limni madridliklar foydasiga yakunlanishiga sabab bo‘ldi.

Ikkinchi bo‘lim boshida mezbonlar hujumga o‘tdi va 52-daqiqada Mehdi Taremi bosh bilan aniq zarba berib, hisobni 2:3 ko‘rinishiga keltirdi. Biroq 59-daqiqada Mbappe o‘zining to‘rtinchi golini urib, farqni yana ikki to‘p farqiga oshirdi. Shunga qaramay, “Olimpiakos” taslim bo‘lmadi va 81-daqiqada Ayub El-Kaabi hisobni qisqartirdi. Biroq bu gol mezbonlarga ochko olib kelmadi va bahs “Real Madrid”ning 4:3 hisobidagi g‘alabasi bilan yakunlandi.

Shu tariqa, “Real Madrid” 5-turdan so‘ng 12 ochko jamg‘argan holda guruhda 5-pog‘onaga ko‘tarildi. “Olimpiakos” esa atigi 2 ochko bilan so‘nggi o‘rinlarda qolmoqda. Navbatdagi turda Xabi Alonso shogirdlari o‘z maydonida “Manchester Citi”ni qabul qiladi, gretsiyaliklar esa “Qayrat”ga qarshi bahs olib boradi.