“Real” himoyachisi yilning eng yaxshi futbolchisi sifatida Messini tanlaganiga izoh berdi

Joriy yilning 28 fevral kuni Parijda FIFA “The Best” marosimini o‘tkazdi. Ovoz berish natijalariga ko‘ra, PSJ a’zosi Lionel Messi o‘tgan yilning eng yaxshi futbolchisi deb topildi. Ovoz berish yakunlari e’lon qilingach, Avstriya terma jamoasi sardori va “Real” a’zosi David Alaba Lionel Messiga ovoz bergani ma’lum bo‘ldi.

Alaba ovoz berishda jamoadoshi Karim Benzemani 2-o‘ringa qo‘ydi. Natijalar e’lon qilingach, David Alaba ijtimoiy tarmoqlarda tanqidga uchradi.

Alabaning Instagram'dagi so‘nggi posti ostida “Real Madrid“ muxlislari uni klubni tark etishga chaqiruvchi 20 mingdan ortiq izohlarni yozib qoldirgan. Bundan tashqari, Alabaning sha’ni va irqiga nisbatan hurmatsizlik qilingan.

Mazkur holatdan so‘ng, Alaba o‘z tanlovini izohlashga majbur bo‘ldi.

“Tanlovimni izohlayman. “The Best” mukofoti bo‘yicha faqat men emas, balki butun jamoa sifatida ovoz berildi. Terma jamoamizda har kim o‘z fikrini aytishi mumkin. Men Benzemaning o‘yiniga qanchalik qoyil qolishimni hamma biladi, men uchun u dunyoning eng yaxshi hujumchisi ekanligini ko‘p marta aytganman. Bunga hech qanday shubha yo‘q”, deydi Alaba.

Eslatib o‘tamiz, “Real Madrid” rahbarlari FIFA talqiniga ko‘ra yil ramziy jamoasiga Vinisius Juniorning kiritilmaganidan norozi. Klub mutasaddilari FIFA'dan, “Real” a’zolariga hech qanday mukofot berilmagani uchun xafa bo‘ldi.