Putin rus tilining Qirg‘izistondagi maqomi uchun Japarovga minnatdorchilik bildirdi

Bugun, 2 iyul kuni Qirg‘iziston Prezidenti Sadir Japarov Moskvada Rossiya Prezidenti Vladimir Putin bilan muzokara o‘tkazdi. Bu haqda ikki davlat rahbarlarining matbuot xizmatlari xabar berdi.

Sadir Japarov Moskvaga amaliy tashrifi doirasida Vladimir Putin bilan tor va kengaytirilgan tarkibda muzokaralar o‘tkazdi. Davlat rahbarlari ikki tomonlama kun tartibidagi dolzarb masalalarni, jumladan, savdo-iqtisodiy, madaniy-gumanitar va migratsiya sohalarini muhokama qildi hamda Qirg‘iziston-Rossiya strategik sheriklik va ittifoqchilik munosabatlarining yuqori darajasiga erishilganidan mamnunligini bildirdi.

Rossiya Prezidenti iqtisodiy hamkorlikdagi ijobiy dinamikani qayd etib, ikki davlat o‘rtasidagi tovar ayirboshlash barqaror o‘sib borayotgani, jumladan, joriy yilning birinchi oylarida sezilarli darajada oshganini ta’kidladi. Shuningdek, u Rossiya korxonalarining Qirg‘izistondagi faol ishini qayd etib, Rossiyaning mamlakatning yetakchi savdo-iqtisodiy sheriklaridan biri maqomini tasdiqladi. Putin Rossiya-Qirg‘iziston taraqqiyot jamg‘armasi faoliyati samaradorligini yuqori baholadi, uning ko‘magida Qirg‘iziston iqtisodiy o‘sishiga xizmat qiluvchi qator muhim loyihalar amalga oshirildi.

Shuningdek, u insonparvarlik, xususan, ta’lim sohasidagi hamkorlik muhimligini ta’kidladi. Ayni paytda Qirg‘izistondagi 43 maktabda 200 nafar rus tili o‘qituvchisi mehnat qilmoqda. Ta’lim rus tilida olib boriladigan maktablar sonini ko‘paytirish rejalari amalga oshirilmoqda.

Vladimir Putin qirg‘iz tomoniga rus tiliga alohida maqom berilgani uchun minnatdorlik bildirib, bu ham gumanitar, ham iqtisodiy sohalardagi hamkorlikni chuqurlashtirishga xizmat qilishini ta’kidladi.

Yakunida u Qirg‘iziston rahbariga konstruktiv muloqot va ikki tomonlama aloqalarni yanada mustahkamlashdan manfaatdorligi uchun minnatdorlik bildirdi.

O‘z navbatida, Prezident Sadir Japarov mazkur uchrashuv ikki davlat manfaatlaridan kelib chiqqan holda strategik sheriklik va ittifoqchilik masalalarini muhokama qilish imkonini berganiga ishonch bildirdi. Davlat rahbari mamlakatlar o‘rtasida to‘liq o‘zaro anglashuv va ishonch hukm surayotganini, hech qanday siyosiy kelishmovchilik va qarama-qarshiliklar yo‘qligini ta’kidladi. 

Shuningdek, u energetika, transport, sanoat va qishloq xo‘jaligi sohalarida hamkorlikni kengaytirish uchun katta salohiyat mavjudligiga e’tibor qaratdi. Shu munosabat bilan davlat rahbari Savdo-iqtisodiy, ilmiy-texnikaviy va gumanitar hamkorlik bo‘yicha Qirg‘iziston-Rossiya hukumatlararo komissiyasi muvaffaqiyatli ish olib borayotganini ta’kidladi.

Muzokaralar yakunlari bo‘yicha ikki davlat rahbarlari barcha muhim yo‘nalishlar bo‘yicha ko‘p qirrali hamkorlikni yanada mustahkamlash niyatida ekanliklarini tasdiqladi.

Ma’lumot uchun, Qirg‘izistonda rus tili rasmiy maqomga ega. Unda respublikada millatlararo muloqot funksiyasi mustahkamlangan.