Putin rejimi biz o‘ylagandan tezroq barbod bo‘ladi – Kara Murza

Rossiyada 25 yillik qamoq jazosiga hukm qilingan taniqli rossiyalik muxolifatchi Vladimir Kara-Murza Putin rejimining yaqin orada yakuniga yetishga ishonch bildirdi. Bu haqda u bugun, 29 aprel kuni “Sobesednik” nashriga bergan intervyusida aytib o‘tdi.

“Mamlakatimiz ustidan zulmat tarqalib ketishiga shubham yo‘q. Va bu bugungi kunda qotillik uchun emas, balki o‘z so‘zlari uchun uzoqroq qamoq jazosiga hukm qilingan odamlarga tuyulishi mumkin bo‘lganidan ancha tezroq sodir bo‘ladi. Tarixchiga ishoning”,  deydi muxolifatchi.

Sud hukmidan keyin o‘zining birinchi intervyusida Kara-Murza Rossiyada ham, butun dunyoda ham juda ko‘p odamlarning qo‘llab-quvvatlashi va birdamligini his qilganini aytgan va bu yordam uchun minnatdorlik bildirgan.

“Men o‘z hukmimni bir yil avval, 2022 yilning aprel oyida qora kiyim va qora niqob kiygan odamlarni mashinam ortidan yugurayotganini ko‘rganimdayoq bilardim. Hozir mamlakatimizda sukut saqlamaslikning narxi shunday. Shunday ekan, bu “sud”ning natijasi oldindan ma’lum edi. Ammo tan olishim kerakki, buning qanday kechganligi meni hayratda qoldirdi. Siyosiy jarayonlarda biz 1970 yillarga emas, balki 1930 yillarga qaytdik”, deydi qamoqdagi muxolifatchi.

Siyosatchining so‘zlariga ko‘ra, unga “Magnitskiy qonunlari”ni targ‘ib qilishdagi faol ishtiroki uchun “oshkora stalincha hukm” chiqarilgan, buning asosida G‘arb davlatlari qonunbuzarlarga qarshi shaxsiy va moliyaviy sanksiyalar qo‘ygan. 

“Shuning uchun meni ikki marta zaharlashdi. Bu ularning o‘zlari nimadan ko‘proq qo‘rqishlarini ko‘rsatadi”,  deya ta’kidlaydi Kara-Murza.

Eslatib o‘tamiz, joriy yilning aprel oyi o‘rtalarida muxolifatchi siyosatchi, tarixchi va jurnalist Vladimir Kara-Murza qattiq rejimdagi koloniyada 25 yilga hukm qilingan edi. Moskva shahar sudi uni davlatga xiyonat qilish, rus armiyasi haqida tuhmat tarqatish va nomaqbul tashkilot bilan hamkorlik qilishda aybdor deb topdi.