Putin qator xalqaro banklarga qo‘yilgan cheklovni bekor qildi

Rossiya Prezidenti Vladimir Putin bir qator xorijiy investitsiya fondlari va taraqqiyot banklariga nisbatan mart oyida sanksiyalarga javoban joriy etilgan maxsus iqtisodiy cheklovlardan voz kechish to‘g‘risidagi farmonni imzoladi, deyiladi qonunchilik ma’lumotlarining rasmiy onlayn reyestrida e’lon qilingan farmonda. Bu haqda TASS xabar berdi.

Ular orasida Osiyo infratuzilmaviy investitsiyalar banki, Xalqaro iqtisodiy hamkorlik banki, Xalqaro investitsiya banki, Rossiya-Qirg‘iziston taraqqiyot jamg‘armasi va BRISS’ning Yangi taraqqiyot banki (NDB – New development bank) bor. 

Xususan, ularga Prezidentning 1 martdagi “Maxsus iqtisodiy chora-tadbirlar to‘g‘risida”gi farmoni asosida belgilangan bitimlar tartibi qo‘llanilmaydi. Bundan tashqari, ushbu banklar va investitsiya fondlari Rossiya rezidentlari tomonidan xorijiy jismoniy shaxslarga kredit berish va Rossiya rezidentlari tomonidan Rossiyadan tashqarida ochilgan hisob raqamlariga chet el valyutasini kiritish bilan bog‘liq xorijiy valyuta operatsiyalarini taqiqlashdan ozod qilinadi.

Osiyo infratuzilmaviy investitsiyalar banki, Xalqaro iqtisodiy hamkorlik banki, Xalqaro investitsiya banki, Rossiya-Qirg‘iziston taraqqiyot jamg‘armasi va Yangi taraqqiyot banki ham Rossiya va Rossiya kompaniyalarining xorijiy kreditorlar oldidagi majburiyatlari bo‘yicha vaqtinchalik tartib-qoidalarga ega emas. Bundan tashqari, AQSH va ularga qo‘shilgan davlat va tashkilotlarning nojo‘ya harakatlariga javoban ko‘rilayotgan chora-tadbirlarda ko‘rsatilgan taraqqiyot banklari va investitsiya fondlariga nisbatan ko‘rsatilgan boshqa cheklovlar ham olib tashlanmoqda.

Musulmon Ziyo