Putin iste’foga chiqayotgan Merkelni guldasta bilan kutib oldi (video)

Bugun, 20 avgust kuni Germaniya federal kansleri Angela Merkel Rossiya poytaxti Moskvaga qisqa muddatli rasmiy tashrif bilan uchib keldi. Bu haqda “Deutsche Welle” xabar berdi. 

Ushbu tashrif chog‘ida Angela Merkel kansler sifatida Vladimir Putin bilan so‘nggi bor muzokaralar o‘tkazadi. Ikki davlat rahbarining oldingi uchrashuvi 2020 yil yanvar oyida bo‘lib o‘tgan.

Ma’lum bo‘lishicha, Germaniya hukumati rahbarining korteji “Vnukovo” aeroportidan darhol Moskva markaziga yo‘l olgan. U yerda Merkel Kreml devori yaqinidagi “Noma’lum askar qabri”ga gulchambar qo‘ygan. 

Germaniya va Rossiya rahbarlarining muzokaralari, allaqachon, boshlangan va taxminan ikki soat davom etishi kutilmoqda. Qayd etish kerakki, Putin Merkelni Kreml saroyida guldasta bilan kutib olgan. 

Ma’lum qilinishicha, muzokaralardan keyin Merkel va Putinning qo‘shma matbuot anjumani bo‘lib o‘tadi. Shundan so‘ng, Germaniya kansleri darhol Berlinga uchadi.

Xabarlarga ko‘ra, Angela Merkel va Vladimir Putin turli sohalarda ikki tomonlama hamkorlikning holati va rivojlanish istiqbollarini muhokama qiladi, shuningdek, bir qator dolzarb xalqaro va mintaqaviy muammolarni ko‘rib chiqadi.

Eslatib o‘tamiz, 2021 yilda Germaniyada parlament saylovlari bo‘lib o‘tadi. Angela Merkel esa hukmron Xristian demokratik ittifoqi partiyasi rahbariligidan ketishini e’lon qilgan.