Putin Bosh prokurorni Oliy sudga rahbar qildi

Rossiya Federatsiya Kengashining Konstitutsiyaviy qonunchilik va davlat qurilishi qo‘mitasi Bosh prokuror Igor Krasnovning Rossiya Oliy sudi raisi lavozimiga nomzodini ma’qulladi. Bu haqda parlament yuqori palatasi matbuot xizmati xabar berdi.

Federatsiya Kengashining tegishli qo‘mitalarida, shuningdek, Prezidentning Shimoliy-G‘arbiy federal okrugdagi vakolatli vakili, Putin tomonidan Bosh prokuror lavozimiga tayinlash uchun ko‘rsatilgan Aleksandr Gutsan nomzodining dastlabki muhokamasi bo‘lib o‘tdi.

18 sentyabr kuni Vladimir Putin Federatsiya Kengashiga Krasnovni Oliy sud rahbari etib tayinlash taklifini kiritdi. Bir kun avval Prezident huzuridagi Sudyalar lavozimiga tayinlash va tugatish masalalarini dastlabki ko‘rib chiqish bo‘yicha komissiyasi Bosh prokuror lavozimiga nomzodini ma’qulladi. 15 sentyabr kuni Oliy malakali sudyalar kollegiyasi ham navbatdan tashqari yig‘ilishda Krasnovning lavozimga tayinlanishini ma’qulladi, u yagona nomzod edi.

Oliy sud raisi lavozimi uni 2024 yilning aprelidan beri boshqarib kelgan Irina Podnosova vafotidan so‘ng bo‘shab qolgandi. U joriy yilning iyul oyida 72 yoshida vafot etdi.

Avgust oyi oxirida Sudyalar oliy malakali kollegiyasi rahbari Nikolay Timoshin Krasnov Oliy sud raisi lavozimiga ariza topshirganini ma’lum qildi. Tanlov e’lon qilinganiga qaramay, Bosh prokuror yagona nomzod bo‘ldi. Krasnov bir vaqtning o‘zida sudyalik malaka imtihonini ham topshirdi.

Igor Krasnov 2020 yilda Bosh prokuror bo‘lgandi, undan avval Tergov qo‘mitasi raisi o‘rinbosari lavozimida ishlagan. 2025 yilning yanvarida Putin uni yana besh yilga Bosh prokuror etib tayinladi, avgust oyida esa “qonun ustuvorligini mustahkamlashdagi xizmatlari va ko‘p yillik samarali mehnati uchun” Rossiyada xizmat ko‘rsatgan huquqshunos unvonini berdi.

Eslatib o‘tamiz, avvalroq Rossiya Prezidenti Vladimir Putin Prezident ma’muriyati rahbari o‘rinbosari Dmitriy Kozakni lavozimidan ozod qilgandi.