Prezident O‘rta Chirchiq tumanidagi bunyodkorlik ishlarini ko‘zdan kechirdi

Bugun, 22 iyul kuni Prezident Shavkat Mirziyoyev O‘rta Chirchiq tumanidagi Qorasuv kanali bo‘yida amalga oshirilgan bunyodkorlik ishlarini ko‘zdan kechirdi. Bu haqda Prezident matbuot xizmati xabar berdi.

Qayd etilishicha, bugungi kunda mamlakatning barcha hududlarida sohil bo‘yi maskanlarini tartibga solish va u yerda zamonaviy sharoitlar yaratishga alohida e’tibor qaratilmoqda. Bunday loyihalar nafaqat aholi uchun qulay dam olish maskanlarini yaratishga, balki yangi iqtisodiy imkoniyatlarni ishga solish orqali hududlarni rivojlantirishga xizmat qilmoqda.

O‘rta Chirchiq tumanidagi Qorasuv kanali sohili ham bugun ana shunday so‘lim maskanlardan biriga aylanmoqda. O‘tgan yili boshlangan qurilish ishlari natijasida 32 milliard so‘mdan ziyod mablag‘ hisobidan sohil bo‘yining 9 kilometr uzunlikdagi qismi obodonlashtiriladi.

Loyiha ikki bosqichda amalga oshirilayotgan bo‘lib, dastlab Tinchlik va Qorasuv mahallalari oralig‘idagi 1,6 kilometr uzunlikda sohil qismi obodonlashtirildi. Piyodalar uchun zamonaviy yo‘laklar, favvora, vorkaut maydonchalari, akvapark hamda ko‘prik osti tunneli aholi xizmatiga shay.

Hududda, shuningdek, manzarali daraxtlar, qulay o‘rindiqlar bilan birga umumiy ovqatlanish va xizmat ko‘rsatish shoxobchalari ham barpo etilgan.

Keyingi bosqichda Qorasuv, Rovatak va Fayzobod mahallalaridan o‘tuvchi qismida ko‘ngilochar, dam olish va gastronomik ko‘chalari tashkil etiladi. Savdo va xizmat ko‘rsatish ob’ektlari soni 6 taga yetkazilib, 150 ta yangi ish o‘rni yaratiladi.

Eslatib o‘tamiz, avvalroq Shavkat Mirziyoyev Toshkent viloyatiga tashrifi chog‘ida Toshkent – Samarqand yo‘nalishidagi yangi yo‘l qurilishini boshlab bergandi. Shuningdek, Prezident Toshkent viloyatiga tashrifi davomida A-373 va Toshkent katta xalqa yo‘llari kesishmasida barpo etilgan yangi yo‘l o‘tkazgichni ko‘zdan kechirgan edi.