Polshaga ham Abrams tanklari beriladi

Polsha armiyasi bu yil ilk marta Amerikaning 58 ta Abrams tankini oladi. Bu haqda bugun, 26 yanvar kuni Polsha bosh vaziri o‘rinbosari, milliy mudofa vaziri Mariush Blashak “Polsha radiosi”ga bergan intervyusida ma’lum qilgan.

Qayd etilishicha, bu yil 58 ta Abrams tanklari Polshaga yetib keladi. Tanklarning dastlabki partiyasini bahorda olib kelish rejalashtirilmoqda.

Blashakning so‘zlariga ko‘ra, Polshaga keltiralayotgan Abrams tanklari eng so‘ngi rusumdagi tanklar emas. 

“Kelgusi yil oxirigacha ularni olish ustida ishlayapmiz. Hozircha bular eski avlod tanklari, ya’ni ishlatilgan tanklar bo‘ladi, ular yordamida biz eski T-72 tanklarini Ukrainaga yetkazib berganimizdan keyin yo‘qotishlarni qoplaymiz”, deydi vazir.

Polsha Mudofaa vazirligi respublika tomonidan 250 ta Abrams tanki xarid qilingani hamda keyinchalik AQSHdan yana 116 ta eskirgan Abrams sotib olinishini ma’lum qilgan.

Alibek Beyjanov