Peres Anchelottini iste’foga chiqarishi mumkin

“Real Madrid” klubi Ispaniya chempionatida ishonchli odimlamoqda. Qolaversa, “los blankos” Yevropa Chempionlar ligasida ham yarim final yo‘llanmasini qo‘lga kiritdi. Bularning barchasida “Real” bosh murabbiyi Karlo Anchelottining ham hissasi katta. Ammo “Qirollik” klubi prezidenti Florentino Peres Anchelottini bo‘shatish haqida o‘ylamoqda. Bu haqda “El Nacional” nashri xabar berdi.

Manbaning xabariga ko‘ra, Karlo boshchiligida “Real Madrid” PSJ va “Chelsi” kabi yirik jamoalarni mag‘lub etgan bo‘lsa-da, klub juda ishonchli o‘yin namoyish qilmagan. Agar, raqiblar biroz aniqroq harakat qilganida madridliklar YeCHLning yarim finaligacha yetib kela olmasligi mumkin edi. Ushu holat esa Peresga unchalik xush kelmadi. “Qirollik” klubi rahbari jamoaning o‘yini ham o‘ta ishonchli ko‘rinishga kelishini xohlaydi.

Anchelotti o‘rniga munosib nomzod sifatida Yoaxim Lyov e’tirof etilmoqda. Chunki Peres ancha paytdan buyon germaniyalik murrabiyni “Real Madrid” boshqaruvida ko‘rishni istaydi. Qolaversa, Lyovda ham “Real”da ishlashga bo‘lgan xohish kuchli ekanligi ma’lum.

Ma’lumot o‘rnida, Yoaxim Lyov Germaniya terma jamoasi boshqaruvidan ozod qilingach, hozircha ishsiz. Uning boshchiligida Germaniya 2014 yilgi Jahon chempionatida zafar quchgan edi.

Ma’ruf Abdumalikov