Pentagon Yaqin Sharqqa yana aviatashuvchi jo‘natdi – WSJ

Pentagon Yaqin Sharqqa uchinchi aviatashuvchi zarbdor guruhi hamda qo‘shimcha dengiz piyodalarining kemalarini yubormoqda. Bu haqda AQSH rasmiylariga tayangan holda “The Wall Street Journal” xabar berdi.

Ma’lum qilinishicha, Kaliforniyadan USS Theodore Roosevelt aviatashuvchi hamda unga hamrohlik qiluvchi kemalar, shuningdek, uchta desant kemasi va dengiz piyodalari mintaqa tomon yo‘l olgan. Armada noyabr oyi oxirigacha mintaqaga yetib boradi va yangi guruh mintaqadagi AQSH qo‘shinlari safiga yana 9 000-10 000 nafar harbiy qo‘shadi.

Ayni paytda Yaqin Sharqda ikkita aviatashuvchi – USS George H.W. Bush va USS George Washington joylashtirilgan. Shuningdek, ayni paytda AQSHning Yaqin Sharq bo‘ylab jami 40 000 dan 50 000 nafargacha harbiy xizmatchisi joylashtirilgan. USS Theodore Roosevelt aviatashuvchi esa rejalashtirilgan harakatlanish doirasida joriy yilning 27 sentyabr kuni San-Diyegodagi joylashuv portini tark etgan.

Shuningdek, joriy yilning 2 oktyabr kuni AQSH Prezidenti Donald Tramp Oq uyda qilgan bayonotida agar Eron “juda adolatli bitim”ni imzolamasa, u “boshqa mavjud bo‘lmaydi”, deya ta’kidlab, muzokaralar boshi berk ko‘chaga kirib qolgan bir vaziyatda o‘z tahdidlarini yana bir bor takrorlagan.

Eslatib o‘tamiz, avvalroq Eron parlamenti spikeri va mamlakatning AQSH bilan muzokaralardagi bosh vakili Muhammad Boqir G‘olibaf Hormuz bo‘g‘ozi AQSH bilan kelishilgan yetti shart bajarilmaguncha ochilmasligini aytgan edi.