Patrushev Putinning yordamchisiga aylandi

FXXning sobiq direktori va Rossiya Federatsiyasi Xavfsizlik kengashining sobiq kotibi Nikolay Patrushev Rossiya Prezidenti Vladimir Putinning yordamchisi etib tayinlandi. Tegishli farmon Kreml saytida e’lon qilindi.

Qayd etilishicha, shu paytgacha Tula viloyatini boshqargan Aleksey Dyumin ham Prezident yordamchisi lavozimini egallagan.

Boshqalar qatorida sobiq ta’lim vaziri Andrey Fursenko va Madaniyat vazirligining sobiq rahbari Vladimir Medinskiy ham Prezident yordamchilari etib tayinlangan.

Shuningdek, Rossiya Prezidenti ma’muriyatida ham tayinlovlar amalga oshirilgan. Avvalroq Putinning yordamchisi bo‘lgan Maksim Oreshkin ma’muriyat rahbari o‘rinbosari bo‘lgan. Putin apparati rahbari lavozimi yana Anton Vaynoga ravo ko‘rilgan.

Kreml voizi Dmitriy Peskovga ko‘ra, Nikolay Patrushev kemasozlik, Aleksey Dyumin mudofaa sanoati, sport va davlat kengashi, Vladimir Medinskiy tarix va madaniyat, Maksim Oreshkin esa iqtisodiyot va transport sohasini boshqaradi.

Ma’lumot uchun, Nikolay Patrushev 1999-2008 yillarda FXXni boshqargan, keyin esa 16 yil davomida Rossiya Xavfsizlik kengashi kotibi bo‘lgan. Vladimir Putin uni 2024 yilning may oyida, beshinchi marta prezidentlik lavozimiga kirishgach, lavozimidan ozod qilgan edi. Patrushev o‘rniga Sergey Shoygu tayinlangan.

Nikolay Patrushevning o‘g‘li Dmitriy Patrushevga ham Putin inauguratsiyasidan keyin Rossiya Bosh vaziri o‘rinbosari lavozimi berilgan.