Pashinyan Putinga KXSHT ustidan shikoyat qildi

Armaniston Bosh vaziri Nikol Pashinyan Yerevan Kollektiv xavfsizlik shartnomasi tashkiloti (KXSHT) ishida ishtirok etmayotganini, chunki tashkilot Tog‘li Qorabog‘dagi vaziyatga nima uchun aralashmaganini o‘z fuqarolariga tushuntirib berolmasligini ma’lum qildi. Bu haqda u kecha, 1 aprel kuni Moskvada Rossiya Prezidenti Vladimir Putin bilan uchrashuvda gapirdi.

“KXSHT bilan bog‘liq muammolarimizni ham hech qachon yashirmaganmiz, chunki 2022 yilda bizda aniq vaziyat yuzaga kelgan edi va menimcha, KXSHT mexanizmlari ishlashi kerak edi, lekin ular ishlamadi. Bu esa, albatta, KXSHT bilan munosabatlarimizdagi hozirgi holatga olib keldi. Biz hozir KXSHT ishida oddiy sababga ko‘ra qatnashmayapmiz: biz haligacha xalqimizga, fuqarolarimizga nima uchun KXSHT reaksiya bildirmaganini va Kollektiv xavfsizlik shartnomasidagi majburiyatlarga zid ravishda harakat qilmaganini tushuntirish holatida emasmiz”, deydi Pashinyan.

Putinning ta’kidlashicha, Yerevanning o‘z pozitsiyasi tufayli tashkilotning nizoga aralashishi noo‘rin bo‘lar edi.

“Shu narsa ayonki, 2022 yilda Pragada Qorabog‘ Ozarbayjonning bir qismi ekanligi tan olinganidan keyin, KXSHT tomonidan Ozarbayjon ichki masalasiga aylangan ushbu jarayonga aralashish mutlaqo noo‘rin bo‘lar edi”, deydi Putin. 

Uning so‘zlariga ko‘ra, Qorabog‘ni Armanistonning bir qismi deb tan olishda “mantiq bor edi”. Shu bilan birga, Rossiya Prezidenti bunday qarorga baho berishdan tiyilgan.

Uchrashuvda iqtisodiy munosabatlar ham muhokama qilingan. Pashinyan Armaniston bir vaqtning o‘zida ham Yevropa Ittifoqi Bojxona ittifoqida, ham Yevroosiyo iqtisodiy ittifoqida bo‘la olmasligini tushunishini aytgan. Putin ikki davlat o‘rtasidagi iqtisodiy aloqalar yaxshi sur’atlar bilan rivojlanayotganini, Rossiyada 2 milliondan ortiq arman yashashini qayd etgan.

Eslatib o‘tamiz, 2024 yil fevral oyida Armaniston KXSHTdagi a’zoligini muzlatishini e’lon qilgan, keyinroq tashkilotning Tog‘li Qorabog‘dagi vaziyatga munosabat bildirmaganini sabab qilib, a’zolik badallarini to‘lashdan bosh tortgan edi. 2025 yil 1 oktyabrda Pashinyan Armaniston amalda KXSHTdan mustaqil bo‘lganini aytib, tashkilot xavfsizlik tizimini “pufak” deb atagan.

2025 yil 27 noyabrda Putin Armaniston o‘zini KXSHTning bir qismi deb hisoblashini, ammo tashkilot tadbirlarida qatnashishdan tiyilib, uning barcha qarorlarini qo‘llab-quvvatlayotganini ta’kidlagan edi.