Paralimpiada-2024: O‘zbekiston umumjamoa hisobida ikki pog‘ona pastladi

Parij shahrida o‘tkazilayotgan XVII Paralimpiada o‘yinlari yakunlanishiga 4 kun qolganida O‘zbekiston delegatsiyasi umumjamoa hisobida ikki pog‘ona pastlab, 12-o‘ringa joylashdi.

4 sentyabr kungi dasturda O‘zbekiston jamg‘armasi faqatgina 1 ta kumush medalga boyidi. Musobaqalarda navbatdagi oltin medallarga sazovor bo‘lgan Ispaniya va Germaniya vakillari reytingda O‘zbekistonni quvib o‘tib, mos ravishda 10 va 11-o‘rinlarni band etdi.

Hozirda O‘zbekistonning eng yaqin ta’qibchisi Hindiston jamoasi bo‘lib turibdi. Hindlar hisobida 5 ta oltin, 9 ta kumush va 10 ta bronza, jami 24 ta medal mavjud. Hindistondan tashqari 5 ta oltin medalga ega Yaponiya, Tailand va Shveysariya O‘zbekistonning eng yaqin ta’qibchilari bo‘lib turibdi. 

Kuchli uchlikda hamon Xitoy, Britaniya va AQSH jamoalari bormoqda. Katta ehtimol bilan bahslar yakuniga qadar top-3'da o‘zgarish kuzatilmaydi.