Oston O‘runovga tuxmat qilgan rossiyalik murabbiy jarimaga tortildi

Rossiya futbol ittifoqining axloq qo‘mitasi “SKA-Xabarovsk” bosh murabbiyi Sergey Yuranni “Spartak” yarim himoyachisi, o‘zbekistonlik futbolchi Oston O‘runovning yoshi to‘g‘risida gapirgan gapi uchun jarimaga tortdi. Bu haqda RIA Novosti xabar qilmoqda.

“Sergey Nikolayevich Yuranni 250 ming rubl jarima bilan jazolash to‘g‘risida qaror qabul qildik. Videoaloqada har ikki tomon ishtirok etdi – huquqshunoslar va Yuranning o‘zi. Agar uning e’tirozi bo‘lsa, apellyatsiya qo‘mitasiga shikoyat keltirishi mumkin”, dedi qo‘mita rahbari Semyon Andreyev.

“SKA-Xabarovsk” futbol klubi bosh murabbiyi, sobiq futbolchi Sergey Yuran “Match Premer” telekanaliga bergan intervyusida Oston O‘runov o‘z yoshini kichraytirganini iddao qilgan edi.

O‘zbekiston futbol assotsiatsiyasi uning bayonotini asossiz va mas’uliyatsizlik deb hisoblashi hamda Oston O‘runovning yoshiga oid aytgan ayblovlari uchun aniq dalil-isbot keltirishini talab qilgan edi. Yurandan futbolchi, O‘FA hamda butun o‘zbek futboli jamoatchiligidan rasmiy ravishda uzr so‘rashini talab qilgan edi.

Shuningdek, assotsiatsiya Rossiya futbol ittifoqi axloq qo‘mitasini ushbu holatni sinchkovlik bilan o‘rganishga hamda Oston O‘runovga, o‘z navbatida, O‘zbekiston futbol assotsiatsiyasi obro‘siga putur yetkazadigan ayblov bilan chiqish qilgan Sergey Yuranga chora ko‘rishga chaqirgan edi.